Kryetari i PD-së, Sali Berisha deklaron se Partia Demokratike synon fitore në mbarë vendin në zgjedhjet e ardhshme lokale.
Nisur nga zhvillimet e fundit në Shkodër, ku një ish-deputet i PL-së iu bashkua Ramës, Berisha u pyet në një intervistë televizive për “Syri Tv” transmetuar këtë të Enjte, nëse rrezikon opozita në Shkodër.
“Shkodra nuk bën kurrë gabim të mbështesë Edi Ramën. Nuk mashtrohet dot Shkodra nga Edi Rama. Nuk mashtrohet dot Shkodra”, u përgjigj Berisha.
Pjesë nga intervista
A ka Sali Berisha në analizën e tij një numër, shifër se cili mund të jetë numri i bashkive që do të fitojë në këto zgjedhje.
Berisha: Fitore në mbarë vendin. Se cili do të jetë numri dhe përqindja nuk them kurrë unë. Unë flas për cilësi, sasira, por jo numra dhe përqindje.
Duket se në Shkodër Rama është investuar maksimalisht me të gjitha grupet e mundshme. A rrezikon opozita në Shkodër.
Berisha: Shkodra nuk bën kurrë gabim të mbështesë Edi Ramën. Nuk mashtrohet dot Shkodra nga Edi Rama. Nuk mashtrohet dot Shkodra.
Betejë tjetër e fortë është Durrësi, Elbasani dhe Tirana. Realisht sa gjasa ka …
Berisha: Realisht janë betejat në të cilat ne do të arrijmë sukseset më të mëdha. Kemi të bëjmë me figurat më të djegura, diskredituara. Çfarë mendoni se do të votojë Tirana një njeri që do të regjistrohet në Guines për mënyrën e vjedhjes së tij. Një kryetar bashkie që shpall tender ditën që fillon punimet dhe punimet i bën me mjetet e bashkisë, për të dalë vetë në fund fitues i tenderit me një emër tjetër. Për të futur në xhep 470 milionë lekë. Të shpallësh tender ditën që fillojnë punimet do të thotë që ja ke dhënë tenderin asaj kompanie. Por kur ajo kompani je ti vetë, ndërmarrja e bashkisë, do të thotë se ti po vjedh paratë e bashkisë. Dhe ky është vetëm një akt i Veliajt, por janë me dhjetëra të tjera. Qytetarët e Tiranës nuk do ta votojnë kurrë këtë, çfarëdo që të bëjë. Ne po e ndjekim, ai po bën gjithçka për të blerë e manipuluar, por ai kurrë nuk do të fitojë.
Sa do të përfshihet në garën e Tiranës.
Berisha: Sali Berisha nuk do të përfshihet në asnjë garë lokale. Unë ndjek linjat e përgjithshme të garës. Si rregull është gara e Tiranës që udhëheq garat lokale të Shqipërisë. Ky është ligji i garës së qeverisjes vendore. Unë udhëheq linjat e përgjithshme të fushatës.
Lulzim Basha para 1 viti në këtë ambient, kur selia ishte blinduar akoma pati thënë se unë fitova në 2011 kundër Edi Ramës se nuk e mora Sali Berishën në fushatë.
Berisha: Në fakt ai fitoi se nuk e dorëzoi Sali Berisha bashkinë. Që të jemi realist. Kurse, isha apo nuk isha, absolutisht çdo ditë në timon të asaj fushatë.
Do të jeni kaq i angazhuar me Këlliçin…
Berisha: Jam në çdo fushatë i angazhuar. Gjëja që njoh më shumë është fushata. Nuk njoh gjë më tepër se fushata elektorale unë.
Berisha, deri në këtë moment, ndryshimet ndërmjet jush dhe Bashës, vetëm në një pikë janë të dukshme. Rama duket se ka vendosur ti vjedhë zgjedhjet siç ka bërë në çdo zgjedhje. Ju keni vendosur të merrni pjesë, ndryshe nga bojkoti i 2019, por e vetmja shpresë e qytetarëve, gazetarëve, që diskutojmë është se ndryshe nga Lulzim Basha, Sali Berisha zgjedhje të vjedhura nuk njeh. Në çfarë mënyrë nuk do ti njihni zgjedhjet. Vetëm me deklarata, se kështu bënte dhe Basha…
Berisha: Deklarata nuk ka vlerë fare. Me fakte. A e morët vesh ju. Mbrëmë u shtrua banket për drejtorët e policisë. Në 30 vite nuk ka ndodhur kurrë që kryeministri të shtrojë darkë për drejtorët e policisë në qarqe, duke u thënë se ju jeni të partisë. Prandaj këtu ka vetëm revolucion.
Ai do të tendojë ti vjedhë zgjedhjet. A ka stabilitet më në këtë vend…
Berisha: Absolutisht kurrë. Jashtë votës nuk ka dhe nuk do të ketë stabilitet. Kjo është e prerë dhe e kemi shpallur ne. Ne do të bëjmë gjithçka që ata të bëhen përgjegjës para se të votohet.
