Dy ministrat përgjegjës për rendin, sigurinë dhe drejtësinë në vend, Bledi Çuçi dhe Ulsi Manja i janë shmangur dhënies së një përgjigje konkrete për shumë prej 404 mijë eurosh që mbetet “jetime”, por iu sekuestrua në banesë Rozeta Dobit, pastrueses që grabiti edhe 120 mijë euro e 30 mijë dollarë në shtëpinë e ish-shefes së kabinetit të Arben Ahmetajt, Alda Klosi.
Të pyetur nga gazetarët se kujt i përket kjo shumë e konsiderueshme parash, ministri i Brendshëm u përgjigj me diplomaci, duke “ia hedhur topin” Prokurorisë që po kryen hetimet për çështjen.
“Çështja e ka kaluar cakun e policisë dhe është brenda dyerve të prokurorisë, kështu që nëse doni një përgjigje në lidhje me këtë duhet të pyesni prokurorinë, por kur është në hetim rezervohet e drejta ligjore për të mos dhënë informacion. Në këtë moment policia bën vetëm çfarë i delegon prokurori”, tha Bledi Çuçi.
Ndërkohë, Ulsi Manjës iu desh të ndalej te fakti se një zyrtare e Ministrisë së Rindërtimit, e më pas Kryeministrisë dhe AMF-së ka pasur të padeklaruar në banesë më shumë se 150 mijë euro.
I ngacmuar nga gazetarët nëse është apo jo i nevojshëm vetting-u në administratë që mund të edhe të jepte përgjigje për mijëra eurot në shtëpinë e Alda Klosit, Manja tha se kjo nuk do të mund të parandalonte plotësisht korrupsionin, pasi sipas tij dikush mund të dalë i pastër në vetting, por më pas përfshihet sërish në mitmarrje.
“Kjo fjala vetting ka fituar një farë qytetarie në Shqipëri. Pavarësisht nëse janë në administratë ose jo, edhe kjo është një masë parandaluese, është një farë parandalimi. A duhet të ketë vetting në gjithë qelizat e administratës? Nuk mendoj se është masë që ndalon fenomenet në vend. Po pas vettingut çfarë do ndodhë? Kjo nuk do të thotë që ky fitoi imunitet ndaj korrupsionit, ndaj janë agjencitë ligjzbatuese. Gjithë agjencitë kanë përgjegjësi për korrupsionin apo fenomenet kriminale. Nëse i bëjmë vetting asaj, ja doli që ishte në rregull, por nesër fillon avazin. Sa i u takon zyrtarëve të lartë publik, ka disa mekanizma që i kontrollojnë”, tha ministri i Drejtësisë.
