Anëtari i Këshillit Kombëtar të PD, Aldo Bumçi u shpreh se nisma për shkarkimin e Enkejeld Alibeajt po shndërrohet në shumicë.
Bumçi në një lidhje me skype për Syri Tv, tha se Gjykata e Tiranës ka patur të gjithë kohën në dispozicion për të marrë vendimin për shkarkimin e Alibeajt, por një gjë të tillë nuk e lejon Edi Rama.
“Është e vërtetë që ka pasur një nisje për mbledhje firmash për shkarkimin e Alibeajt dhe duket që po shkon drejt një shumice ndersa u mor ky akt i dëshpëruar. Kjo nuk është një beteja me zotin Alibeaj, kjo është me Edi Ramën. Zoti Alibeaj është thjesht një instrument që po përdoret. Kush e pengoi gjykatën që të marri një vendim?! E pengon Edi Rama. Edhe një fëmijë e di se kush e drejton Partinë Demokratike. Është Edi Rama ai që nuk e lejon avokatin që të marrin vendimin. Është Edi Rama Ai që i thotë opozitës ‘keni 2 minuta, jeni deputetë të pavarur’. Janë përzenë 5 deputetë të Partisë Demokratike që janë përjashtuar më shumë se 1 vit më parë. Nuk ka asnjë bazë ligjore në Kushtetutën e Shqipërisë, në ligjin e Parlamentit ku të bazohet përjashtimi. Gjykata kishte kohë plotë për të marrë vendimin për shkarkimin e Alibeajt por nuk e lejon Edi Rama“, u shpreh Bumçi.
Aktet e Alibeajt duke pretenduar se ka përjashtuar katër deputetë nga grupi i PD, sipas Bumçit tregojnë vështirësinë ku ndodhet Edi Rama.
“Para këtij fakti merren akte të tilla sikur opozita është e përçarë, sikur opozita ka probleme, mbahen emisione nga mëngjesi deri në darrkë me fraksione në opozitë kur në fakt e vërteta është ringritja e fuqishme e opozitës nga përpjekja për ta vrarë atë në vitin 2021. Një opozitë që i mbijetoi atij sulmi për ta vrarë sot mbush bulevardet e Shqipërisë siç e pamë në 3 protesta madhështore që u mbajtën këtë vit. Bashkimi i opozitës në kuadër të zgjedhjeve lokale kemi nxjerrë kandidatën 5-6 muaj përpara, nuk ka ndodhur kurrë, në një proces që përfshiu mbi 50 mijë anëtarë. Pra ndaj këtyre fakteve ndërmerren akte të dëshpëruara që tregojnë vështirësinë ku ndodhet Edi Rama. Thirrja e dytë është për demokratët që kanë qëndruar për arsyet e tyre deri dje në krahët e Alibeajt, që ky është një moment kthjellimi që mos të qëndrojnë më pas akteve të tilla që qëndrojnë pas Edi Ramës dhe pashallëkut të tij”, tha Bumçi.
