Autoritetet shqiptare kanë refuzuar hyrjen në Shqipëri të dy zyrtarëve të OKB-së.
“Personat janë cilësuar si të papërshtatshëm për të hyrë dhe punuar në Shqipëri, si vend anëtar i NATO-s dhe që ka hapur negociatat për në BE”, tha një burim diplomatik në Ministrinë për Europën dhe Punët e Jashtme të Shqipërisë, që nuk saktësoi se për cilën agjenci të OKB-së punojnë dy zyrtarët dhe as identitetet e tyre.
Dy zyrtarët e OKB-së dyshohet se janë me origjinë ruse, e cila mendohet se ka ndikuar në marrjen e këtij vendimi nga ana e autoriteteve të qeverisë shqiptare, e cila ka qenë nën presion nga aleatët euroatlantikë që të marrë vendime të ashpra ndaj zyrtarëve të huaj me origjinë ruse që emërohen në Shqipëri.
Në mes të nëntorit 2022, Shqipëria vendosi t’i refuzojë akreditimin shtetases Nadia Chamilova, që erdhi në korrik në Shqipëri si përfaqësuese e UNODC-së (Zyrës së Kombeve të Bashkuara për Drogën dhe Krimin). Shtetasja ruse nga republika e Dagestanit, por me pasaportë kanadeze, duhet të merrte akreditimin që të niste punën në zyrën e UNODC, megjithëse ajo vijon ta bëjë këtë prej gati tre muajsh, edhe pa leje pune, ndërsa ka afat qëndrimi rreth 90 ditë në territorin shqiptar.
Sipas shkresave të siguruara nga tpz.al, më 31 maj 2022, Zyra e OKB-së për Drogat dhe Krimin (UNODC) njoftoi Misionin e Përhershëm të Shqipërisë në OSBE, se zonja Naida Chamilova është emëruar shefe e Zyrës së Programeve të UNODC-së në Shqipëri. Përmes një shkrese të datës 1 qershor 2022, ambasadorja e Shqipërisë në OSBE, Vjenë, Eglantina Gjermeni, njoftoi Ministrinë e Jashtme të Shqipërisë, se Chamilova do të niste detyrën më 1 korrik, duke qenë njëherësh edhe Koordinatore Rajonale për Progamin e Kontrollit të Konteinerëve UNODC-WCO për Europën Juglindore.
Në letrën e shefit të Seksionit të UNODC-së për Europën, Azinë Perëndimore dhe Qendrore, Alexandre Schmidt, thuhet se Chamilova iu bashkua UNODC-së në vitin 2016, ndërsa edukimi i bazë është ai për mësuesi, diplomuar në Republikën ruse të Dagestanit në vitin 1985 dhe më pas në Moskë, ku ka kaluar shumicën e jetës dhe të përvojës profesionale.
Zonja Chamilova ishte përfaqësuese e zyrës së UNODC-së në Kiev të Ukrainës dhe u largua pas nisjes së pushtimit. Ajo ka hyrë dhe dalë disa herë nga Shqipëria gjatë muajve të fundit, duke marrë pjesë edhe në aktivitete rajonale të agjencisë që përfaqëson në Tiranë.
Pas vendimit të ministrisë për të mos e akredituar, shtetësja ruse po shfrytëzon afatin tre mujor të qëndrimit në territorin shqiptar, duke sfiduar autoritetet shqiptare/TPZ
