Nga Boldnews.al
Për Komisionin Europian, disa nisma të qeverisë shqiptare, si ajo për legalizimin e kanabisit për qëllime mjekësore, ligji për zonat e mbrojtura apo amnistia penale, kanë ngritur shqetësime.
Por, në përgjithësi, sipas Brukselit zyrtar, situata politike, ekonomike, e shtetit të së drejtës, rendi e siguria dhe lirive të njeriut është e mirë. Aq e mirë, sa në Raport thuhet se Brukseli mbështet dëshirën e Shqipërisë për të mbyllur negociatat me Bashkimin Europian brenda vitit 2027.
Është e tepërt të imagjinohet reagimi i ndonjë austriaku të shtresës së mesme, apo i ndonjë danezi apo gjermani, nëse do të lexonte një raport të tillë. Pyetja më logjike dhe më ironike do të ishte: Ku është kjo Shqipëri?
Se, natyrisht, ajo që njohin ata, jo thjesht për eksocentrizëm, por sidomos për zhvillimet në këtë shtetin tonë, të drejtuar nga një kastë anadollako-ballkanase, me prirje autoritariste, nuk përputhet aspak me frazat e sheqerosura të hedhura në dokumentin gati 100 faqësh të hartuar nga burokratët e zyrës së BE-së në Tiranë dhe të miratuar nga zyra e Ursula von der Leyen në Bruksel.
Por, nëse një gjerman, austriak apo suedez do ta shihte me skepticizëm një raport të tillë, shumë më ndryshe ndodh në Shqipëri. Për të “festuar” fjalët e mira për arritjet e qenësishme në rendin dhe sigurinë në vendin tonë, kanë menduar disa “autorë të paidentifikuar” në Shkodër.
Në mungesë të fishekzjarreve, të cilat janë bllokuar me forcë nga qeveria, një automjet në lëvizje “festoi” në rrugët e Shkodrës me breshëri kallashnikovi, duke lënë të paktën dy të vdekur dhe dy të plagosur, një bilanc i rëndë, por që fatkeqësisht edhe mund të rëndohet më shumë.
