Kryeministri Edi Rama u mburr këtë të Enjte përmes një postimi në FB, lidhur me shifrat e eksporteve bujqësore, duke e shitur si një sukses të qeverisë.
Sipas tij, viti 2022 ka shënuar një rekord absolut përsa i përket eksporteve bujqësore. “2022 jo vetëm rekord absolut i eksporteve bujqësore, po edhe realizim i objektivit ambicioz për gjysëm miliardë USD në 78 vende të botës. Por ambicia jonë është të kapim 1 miliardë USD dhe ta bëjmë #Shqipërinë2030🇦🇱 kampione të Ballkanit edhe në eksporte bujqësore”, shkruan Rama në rrjetet sociale, ndërsa më tej sulmon mediat.
“… dhe pastaj disa që fshatin e shohin vetëm me dylbitë e mediave thonë ka vdekur bujqësia”, përfundon.
Bashkë me këtë reagim, poston edhe një foto ku thuhet se eksportet për 11 mujorin e 2022 janë 17 përqind më të larta se e njëjta periudhë e një viti më parë.
Megjithatë, “suksesin e jashtëzakonshëm” për të cilin flet kreu i qeverisë, ish-zëvendësministrja socialiste e Financave Irena Beqiraj, e lexon ndryshe.
Duke iu referuar Bankës Botërore, ajo shpjegon se indeksi i çmimeve për produktet bujqësore pa përfshirë grurin është rritur 14.9% gjatë 11 muajve të parë të vitit që lamë pas. Ndaj, shton se edhe rritja reale mesatare e eksportit, sipas saj, është në rastin më të mirë 17%-14.9% = 2.1%.
“Syzat e mediave padyshim që nuk tregojnë realitetin, por realitetin nuk e tregojnë as dylbitë e vlerës nominale të Znj. Krifca. Realitetin e tregon rritja reale, për çdo produkt të portofolit duke e zhveshur nga rritja e çmimeve edhe ne mendimin tim modest, në 10 vjeçarin e qeverisë socialiste ka pasur vite ku e ku më te mira për bujqësinë”, shprehet Beqiraj.
Reagimi
Në një postim në rrjetet sociale, ish-numri dy i Ministrisë së Financave shkruan:
Disa informacione në ndihmë të Kryeministrit! Duke analizuar punën e qeverisë, Kryeministri na informon që eksportet e produkteve bujqësore në vlerë nominale janë rritur me 17% në periudhën Janar 2022 – Nëntor 2022.
Por ka edhe një fakt tjetër që siç duket Kryeministrit nuk ja kanë thënë. Pikërisht për 11 mujorin çmimet e produkteve bujqësore, në Europë(ku ne kryesisht eksportojmë) janë rritur me më shumë se 14%, ku frutat edhe perimet janë rritur me 25%.
Po të llogarisim indeksin e rritjes se çmimit për portofolin tonë të eksportit kam frikë se rritja e citimeve e tejkalon 17%, duke e kthyer pamjen përmbys.
Por le të bëjmë një llogari të thjeshtë jo te detajuar. Le ti referohemi indeksit te Bankës Botërore, i cili thotë që indeksi i çmimeve për produktet bujqësore pa përfshirë grurin është rritur 14.9%. Thënë këtë, rritja reale mesatare e eksportit është ne rastin më të mirë 17%-14.9% = 2.1%.
Syzat e mediave padyshim që nuk tregojnë realitetin, por realitetin nuk e tregojnë as dylbitë e vlerës nominale të Znj. Krifca.
Realitetin e tregon rritja reale, për çdo produkt të portofolit duke e zhveshur nga rritja e çmimeve edhe ne mendimin tim modest, në 10 vjeçarin e qeverisë socialiste ka pasur vite ku e ku më te mira për bujqësinë!
