Udhëtarët nga Kina nuk do të pranohen në shtetet e Bashkimit Europain pa test negativ Covid pas shtimit të numrit të infektimeve.
Organizata Botërore e Shëndetësisë raportoi për një variant të ri të koronavirusit që po përhapet me shpejtësi dhe është më ngjitës. Por qeveria shqiptare edhe pas paralajmërimit të OBSH-së nuk ndihen aspak të shqetësuar.
Epidemiologia Dr Maria Van Kerkhove e Organizatës Botërore të Shëndetësisë (OBSH) tha se nënvarianti i ri i Omicron është zbuluar tashmë në 29 vende dhe ndoshta ekziston edhe në më shumë në realitet. Lloji i ri ka mutacione që e lejojnë atë të infektojë dhe të shumohet shpejt.
“Ne jemi të shqetësuar për avantazhin e tij të transmetimit . Sidomos në disa vende të Evropës dhe Amerikës së Veriut, kryesisht në verilindje të SHBA, XBB.1.5 ka zëvendësuar shpejt variantet e tjera që ishin në qarkullim,” tha ajo, duke vënë në dukje se së shpejti do të publikohet nga OBSH një vlerësim rreziku për HBV.1.5.
Ish-ministri i Shëndetësisë, njëherësh dhe nënkryetar i Partisë së Lirisë Petrit Vasili i bën thirrje autoriteteve shëndetësore shqiptare që të marrin masa sa më shpejt në mënyrë që të matet pasoja që mund të ketë në vend ky variant i ri.
Në një postim në Facebook, Vasili thekson se situata në Kinë ka dimensionet e vërteta të një pandemie dramatike, por për fat të keq, thotë Vasili, Komiteti i Ekspertëve po bën një vlerësim sipërfaqësor dhe nuk po merr masa.
“Covid kërkon vlerësim serioz profesional, boll më me klishe propagande empirike!
Dukshëm situata e COVID në botë ka pësuar një ndryshim të fortë në kahun negativ.
Situata në Kinë ka dimensionet e vërteta të një Pandemie dramatike në kuptimin më të plotë të fjalës.
As fuqia organizative dhe as ajo mjekësore e Kinës nuk ia ka dalë dot të kontrollojë këtë situatë kaq të rëndë ku ka qindra milionë të infektuar dhe dhjetëra mijëra humbje jete.
Bashkimi Europian ka adaptuar masën e kërkimit të tamponëve për të gjithë udhëtarët që vijnë nga Kina.
Nënvarianti i fundit i COVID, një tjetër spinoff i Omicron, i quajtur zyrtarisht XBB.1.5 – është në qarkullim në disa shtete dhe ka fuqi infektuese mjaft të larte dhe tendencë për të mos u kontrolluar nga antitrupat dhe nga subjektet e vaksinuar.
Kohë më parë kam kërkuar publikisht që autoritetet shëndetësore shqiptare të merrnin masa në kohën e duhur pas kufizimeve për udhëtarët që vendosi Italia, SHBA, etj., etj.
Komiteti i Ekspertëve për fat të keq me një vlerësim sipërfaqësor u mjaftua me arsyetimin se BE nuk kishte marrë një masë të tillë.
Çdo vend vlerëson kapacitetet e tij, risqet dhe mundësinë e përballimit të situatave pandemike, ndaj edhe Komiteti i Ekspertëve duhej të thellohej e të analizonte me shumë skrupulozitet situatën.
Aktualisht, po t’i referohemi p.sh. datës 3 janar në Shqipëri janë bërë rreth 85 testime, kjo do të thotë se mundësia e njohjes reale të situatës janë thuajse zero.
Ndaj përsëris thirrjen që Qeveria përmes Ministrisë së Shëndetësisë të veprojë me përgjegjshmëri dhe profesionistët të thonë fjalën e tyre bazuar mbi shkencën dhe të dhënat objektive që lidhen me realitetin shqiptar.
Boll më me klishe propagande!
Atje ku përbuzet shkenca mjekësore, triumfon sëmundja dhe fatalitetet e lidhura me të.
Shqiptarët i kanë paguar me jetën dhe shëndetin e tyre pasojat e gabimeve të rënda të administrimit nga qeveria të Covidit në vitet 2020 – 2022. Ndaj reflektoni shpejt dhe tani!”, shprehet nënkryetari i PL-së, Petrit Vasili.
