Një zyrtar britanik që punonte për Forcat Kufitare të Mbretërisë së Bashkuar është vënë në pranga pasi dyshohet se është një emigrant i parregullt. Emri i zyrtarit ende nuk është bërë i ditur, ndërsa thuhet se ai është me origjinë nga një vend i Ballkanit, shkruan The Sun.
Ai u arrestua ndërsa punonte për agjencinë e Home Office, përgjegjëse për mbrojtjen e kufijve të Mbretërisë së Bashkuar. Rasti shfaqet teksa qeveria e Britanisë po përpiqet të frenojë migrimin e paligjshëm, me 45,000 kalime në varka të vogla këtë vit.
Zyrtari i arrestuar që mendohet të jetë rreth të 30-tave ka mbërritur në Britaninë e Madhe rreth 20 vjet më parë nga Ballkani, në atë kohë ai ishte një adoleshent.
Pretendohet se ai ka gënjyer në dokumentet për origjinën e tij në mënyrë që t’i jepet e drejta për të qëndruar në Britani, dhe më vonë ka vazhduar të punojë për Home Office.
“Në atë kohë, qindra të rinj shqiptarë erdhën në Britani duke pretenduar se ishin kosovarë për të fituar azil”, raporton The Sun, duke shtuar se “i njëjti burrë besohet gjithashtu të jetë në mesin e katër punonjësve të Forcave Kufitare që u arrestuan për një incident më 6 dhjetor”.
