Kreu i Partisë Republikane Fatmir Mediu kërkon të thirret sa më parë Këshilli i Sigurisë Kombëtare për situatën e tensionuar në veri të Kosovës. Ai shprehet se kjo situatë e agresionit ushtarak është e njëjta sjellje si e Rusisë me Ukrainën.
Ai bën thirrje për konsultim dhe koordinim me vendet e tjera të NATO-s në Ballkan, pasi shpenzimet ushtarake të Serbisë me mbështetjen e Rusisë dhe Kinës, janë tashmë një shqetësim real për vendet e Ballkanit, por dhe për aleatët.
Mediu bën gjithashtu thirrje që në bashkëpunim me SHBA dhe vendet e tjera partnere që kjo çështje të shtrohet në Këshillin e Sigurimit të OKB-së.
Statusi i plotë i Fatmir Mediut:
Të thirret sa më parë Këshilli i Sigurisë Kombëtare. Shqipëria nuk mund të mbaj këtë pozicion të papranueshëm në lidhje me situatën në Kosovë:
Vendosja e mbi 5000 trupave Serbe në kufi me Kosovën me gjithë mjetet luftarake është qartësisht agresioni ushtarak, është e njëjta sjellje si e Rusisë me Ukrainën.
Çfarë duhet të ndodh më që të mblidhet Këshilli i Sigurisë Kombëtare.
Presidenti i Republikës, pavarësisht se Këshill ka kohë që ka dalë nga funksioni i tij Kushtetues duhet ta thërras urgjent atë dhe të përcaktojë detyrimet e qeverisë, shërbimeve inteligjente dhe atyre diplomatike për këtë situatë
Çfarë duhet të presë Kryeministri, që ta shtrojmë këtë çështje dhe situatë urgjentisht në NATO?
Konsultimi dhe koordinimi me vendet e tjera të NATOS në Ballkan është domosdoshmëri, sepse jo vetëm situata në Kosovë, por dhe ajo në BiH, në Malin e Zi dhe shpenzimet ushtarake të Serbisë me mbështetjen e Rusisë dhe Kinës, janë tashmë një shqetësim real për vendet e Ballkanit, por dhe për aleatët tanë
Në bashkëpunim me SHBA dhe vendet e tjera partnere duhet kjo çështje të shtrohet në Këshillin e Sigurimit të OKB.
Serbia dhe Vuçiç po ndjekin qartësisht udhëzimet e Rusisë dhe Putinit për të realizuar qëllimet e tyre në Ballkan si dhe për të krijuar një konflikt në rajon, pjesë e strategjisë të deklaruar të Rusisë
