Nga Boldnews.al
Nëse vasaliteti i mendjes do kishte një kufi, ai prag nuk do të kalohej nga askush, por duket se për kreun e qeverisë shqiptare gjithçka është një tallava politike, edhe kur bëhet fjalë për interest kombëtare dhe shtetërore. Rama priti kryeministrin grek Mitsotaqis në një takim që pati në Himarë, Finiq dhe Derviçan. Pikërisht nga Himara, që nuk njihet as si zonë kufitare me Greqinë, e aq më pak “bashki monoritare”, kreu i qeverisë greke dha deklarata që shkojnë përtej “miqësisë së fqinjëve”.
“Unë jam dhe do të mbetem mbështetës i rrugës europiane të Shqipërisë dhe detyrimi i Shqipërisë është të respektojë plotësisht të drejtat tuaja në çështjen e vetëvendosjes, në çështjen e gjuhës dhe në çështjen e të drejtave tuaja pronësore”, tha Mitsotakis, i cili shtoi gjithashtu se ishte krenar që ishte kryeministri i parë grek që vizitonte qytetin e Himarës.
Rama nuk u ndje, duke tentuar që të lerë pas disa batuta miqësore që e shumta mund të bëjnë të qeshin Rilindasit e tij që për fatin e keq personal kanë larë dhe shpëlarë shqisën e të menduarit në lavatriçen propagandistike të qeverisë. Në fakt vizita e Mitsotaqis ishte një shenjë që Greqia tenton të tregojë forcën e saj për të qenë penguese në çdo hap që mund të kërkojë Shqipëria për integrimin e mëtejshëm në BE. Gjithashtu si haraç kërkojnë shtrirjen edhe më të madhe në detin Jon, pikërisht në pjesën që njihen si “zona ekonomike”, të pasura me naftë dhe gaz.
Ata flamuj grek të valëvitur kudo, ajo pritje kryesisht nga të moshuar që kanë mbetur në këto zona, nuk ishin pamja vetëm e një territori të caktuar në Jug, të cilit i mungon rinia, por është shpopullimi i të gjithë vendit. Individët të cilët e konsiderojnë veten minoritarë grek, duke i shtuar prapashtesën aspak historike “minoritet etnik”, ngritën si shqetësim çështjen e pronësisë. Në fakt këtë shqetësim nuk e ngre vetëm Dhmitraqi nga Derviçani, por edhe Mit’hati në Berat, Frani në Mirditë, Hasani në Tiranë apo Hyseni në Durrës e kudo tjetër në Shqipëri.
Duke iu referuar gazetës kryesore greke Kathimerini, deklarata e Mistotaqis për “vetëvendosje” për çështjen e gjuhës dhe pronësisë, është zjarri që sapo është ndezur dhe ata që po ngrohen janë nacionalistët ekstremisë që sjellin në mendje “Vorio Epirin”. Fatkeqësisht Rama as nuk shprehu shqetësim për këtë qëndrim të rrezikshëm nga kreu i qeverisë greke, përkundrazi, vijoi me premtime se do ngrinte monument për babain e kryeministrit grek, mu bash e në qendër të Derviçanit.
Mitsotaqis iku i lumtur nga vizita disaorëshe në Shqipëri, duke bërë një paradë force ku kishte sjellë edhe helikopter të ushtrisë greke për lëvizjen e tij dhe një shpurë të madhe shoqëruesish që i dolën “Zot sigurisë” së kryeministrit të tyre, në një tokë tjetër. Deklaratat boshe për marrëdhënie të mira me Greqinë, nuk mund të mbulohen me shtrëngime duarsh dhe përshendetjen e Misotaqis duke iu drejtuar Ramës “Jasu Palikari”- që në gjuhën greke përkthehet “përshëndetje shok, (mik)”.
