“Kam tre vjet që nuk kam shkollë, kam shumë dëshirë që shkolla jonë të bëhet”. Me këto fjalë iu drejtua një vogëlushe Ministres së Arsimit Evis Kushi dhe kryeministrit Edi Rama, gjatë një aktiviteti me nxënës të shkollave.
Në muajin Tetor, ministrja Kushi njoftoi hapjen e konkursit të pikturës “Shqipëria Ime 2022”, që siç u shpreh, “konsistonte në dërgimin e foton e pikturës nga nxënës, e cila përcjell një peizazh, simbol apo moment të veçantë nga historia dhe vendi ynë i mrekullueshëm, plot vlera e bukuri”.
Aktiviteti i ndarjes së certifikatave për fituesit e konkursit u publikua këtë të Martë, në faqen në FB të kreut të qeverisë Edi Rama.
Gjatë fjalës së tyre, ministria Kushi dhe kreu i qeverisë Edi Rama u mburrën për punët në arsim, ndërsa nuk munguan as këshillat, veçanërisht nga kreu i qeverisë. Ky i fundit u foli fëmijëve për vështirësitë dhe bukuritë e artit, ndërsa u dha mend dhe prindërve për edukimin e të vegjëlve.
“Gjithëpërfshirja është parimi ynë bazë në sistemin arsimor”, tha Kushi mes të tjerash.
Në një moment, një vogëlushe i afrohet kryeministrit e ministres dhe u tregon se ka tre vjet që në fshatin e saj nuk ka një shkollë. Më tej, i lutet që Goriçani i Beratit të ketë një të tillë.
Ministrja i përgjigjet se “shkolla do të bëhet”. “Po punohet”, i tha ajo vajzës.
Ndërkohë, Kryeministri Edi Rama e injoroi. Nga ana tjetër, veç ligjërimit dhe batutave me nxënësit, ai shfaqi interes të veçantë që të shkrepte fotografi me ta.
