Nga Boldnews.al
Kompania shtetërore e naftës, “Albpetrol”, i ka dhënë një tender 150 mijë euro kompanisë së Bardhi Melit, një ish-zyrtari të lartë të Agjencisë Kombëtare të Burimeve Natyrore (AKBN), nën dyshimet e shkeljes flagrante të kritereve të përcaktuara nga vetë institucioni për këtë procedurë.
Në 15 Dhjetor 2022, kompania shtetërore e drejtuar nga një zyrtar i lartë socialist, Eltar Deda, ka shpallur rezultatet e tenderit “Blerje purteka (16 mm, 22 mm dhe 25mm)”, me fond limit 17.585.000 lekë të reja.
Fitues i këtij tenderi është shpallur kompania “USalb & Co”, me ofertë 17.319.100 lekë të reja ose rreth 265.000 lekë të reja më pak. Ndërkohë në faqen e internetit të Agjencisë së Prokurimit Publik nuk jepen detaje nëse ka pasur pjesëmarrës të tjerë në këtë tender.
Shkelje kriteresh
Kompania e Bardhi Melit duket se nuk plotësonte një prej kritereve bazë të vendosura nga kompania “Albpetrol”, atë të kapacitetit ekonomik dhe financiar.
Në dokumentat e tenderit me vlerë 150 mijë euro thuhet se kompanitë pjesëmarrëse duhet të dorëzojne “kopje të çertifikuar të bilancit për vitin financiar 2021…”.
Po ashtu, institucioni i drejtuar nga Eltar Deda, kishte parashikuar si kriter për t’u plotësuar nga kompanitë pjesëmarrëse në tender edhe dorëzimin e “vërtetimit për xhiron vjetore për vitet financiare 2019, 2020, 2021, ku vlera e xhiros për të paktën një nga vitet e periudhës së kërkuar duhet të jetë jo më e vogël se vlera e fondit limit”.
Të dhënat zyrtare dëshmojnë që kompania fituese e tenderit nuk plotëson asnjë prej këtyre kritereve.
Konkretisht, shoqëria “USalb & Co” është themeluar në 15 mars 2022 dhe është regjistruar në Qendrën Kombëtare të Biznesit një javë më vonë, në 23 mars 2022.
Pra, shoqëria në pronësi të Bardhi Melit nuk plotësonte asnjë prej këtyre kritereve, pasi nuk ka pasur mundësi reale për të dorëzuar as bilancin financiar të vitit 2021 dhe as vërtetim për xhiron vjetore të viteve 2019, 2020 dhe 2021. Për faktin e thjeshtë-ajo nuk ka ekzistuar në atë kohë.
Por, megjithatë, ajo rezulton fituese në tenderin e zhvilluar nga institucioni i drejtuar prej ish-deputetit socialist, Eltar Deda.
Meli, karriera politike
Inxhinjeri Bardhi Meli ka pasur më herët një karrierë intensive politike, para se t’i rikthehej angazhimit të tij profesional.
Ai ka qenë kryetar i Bashkisë së Patosit në vitet 2007-2011, nën siglën e Partisë Socialist. Më tej kaloi në radhët e Lëvizjes Socialiste për Integrim.
Pas vitit 2013, kur LSI erdhë në pushtet në koalicion me Partinë Socialiste, Bardhi Meli mbajti për disa kohë pozicioni e zv.drejtorit të përgjithshëm të Agjencisë Kombëtare të Burimeve Natyrore (AKBN).
Agjencia BIRN në një raportim të mëhershëm, ngriti dyshimet se Meli, në cilësinë e zyrtarit të AKBN-së, kishte nënshkruar kontrata me një kompani nën hetim për kontrabandë, “Phoenix Petroleum”, në pronësi të Isuf Berberit, një biznesmen i lidhur gjithashtu ngushtë në atë kohë me Lëvizjen Socialiste për Integrim.
Bardhi Meli ishte kandidat për deputet i LSI-së në zgjedhjet e përgjithshme të vitit 2017, por nuk arriti të siguronte një vend në Parlament.
Tashmë, prej marsit të vitit 2022, ai është rikthyer në profesionin e tij, duke krijuar shoqërinë private “USalb & Co”.
