Për analistin Ilir Kalemaj nëse dje garën për kreun e SPAK, e fitoi drejtësia, qeveria apo ambasada e SHBA, thotë se ka disa premisa që u bazua votimi i djeshëm bazuar në deklaratat e njëpasnjëshme të ambasadores Yuri Kim, të Kryeministrit Edi Rama dhe heshtja e opozitës dhe mos prononcimi i saj në favor të njërit apo tjetrit kandidat.
Nga studio e lajmeve të MCN Tv, Kalemaj tha se Altin Dumani i zgjedhuri në krye të SPAK është i preferuari i Shteteve të Bashkuara të Amerikës, ndërsa ai që u rendit i dyti është i preferuari i Kryeministrit Edi Rama.
Sipas tij, prezenca simbolike e ambasadores Yuri Kim në ditën e votimit, me mesazhe me nëntekste të forta, shihet si basti i saj i fundit para mbarimit të mandatit, se ishte drejtuesi i SPAK, i cili përcakton axhendën për këtë institucion por dhe mbi goditjen e korrupsionit në nivele të larta.
“5 anëtarë të KLP votuan për zotin Dumani ishin të gjithë prokurorë, 4 anëtarët që votuan për të preferuarin e mazhorancës, ishin anëtarë joprokurorë, të zgjedhur në parlament me votat e mazhorancës socialiste.
Që do të thotë se Partia Socialiste këmbënguli deri në fund për kandidatin e preferuar prej saj. Pjesa profesioniste e KLP ata që janë prokurorë karriere zgjodhën kandidatin Dumani, duke dhënë shpresë për paanësi nga politika.
Nuk prirem të besoj se do ndodhë ndonjë mrekulli që nuk ka ndodhur më parë me zotin Dumani.
Secili nga prokurorët e SPAK edhe para Dumanit, mund t’i drejtojnë çështjen e veta të pashqetësuar, pasi këtë nuk e vendos kreu i SPAK.
Axhenda që përcakton kreu i SPAK është e lidhur me prioritetet, korrupsionet në nivele të larta drejtuese dhe krimin e organizuar.
Kemi parë suksese në drejtim të krimit të organizuar për aq sa mund të quhen.
Por kemi parë shumë pak progres të korrupsionit në nivele të larta dhe çuarja me prova para GJKKO të eksponentëve të lartë të administratës publike apo ish-funksionarë të saj.
Të vetmit e çuar për çështjen e inceneratorëve janë zoti Bllako dhe zoti Koka, por ka zyrtarë më të lartë për tu hetuar”, tha ai.
Lidhur me pakënaqësinë si nga Rama edhe Berisha, për zgjedhjen e Dumanit në krye të SPAK, Kalemaj tha se të dy palët e politikës janë të pakënaqur me punën e deritanishme të SPAK dhe me premtimin e asaj që mund të bëjë tani e tutje.
“Janë edhe kritikë me proceset e vetingut. Por kjo është paradoksale për zotin Rama më shumë se për zotin Berisha. Se Berisha është konstant në qëndrimin kundër reformës në drejtësi.
Ndërsa Rama që e quan kryereformë dhe lavdëron punën e saj, është skeptik për vetingun dhe ndërhyrjet e tij janë ashiqare në SPAK.
Qeveria u përpoq në çdo mënyrë dhe dështoi në arritjen e objektivit. Pjesa e zgjedhur e PS votoi në bllok kandidatin e preferuar të mazhorancës.
Për zotin Meta, prirem të besoj paktin e heshtur, se amerikanët nuk të japin garanci aq më tepër eksplicite.
Zoti Meta ka pasur piruetat e veta në marrëdhënie me amerikanët
. Kemi pakt të heshtur, natyrisht zoti Meta e ka shmangur muajt e fundit çdo konfrontim të hapur me amerikanët, madje ka flirtuar duke qenë në takime të organizuara nga ambasadorja Kim dhe ka qenë më i tërhequr në raport me marrëdhëniet dhe konfrontimet me amerikanët”, shtoi ai.
Ndër të tjera, Kalemaj nuk e sheh aspak të qetë situatën në Partinë Socialiste, pavarësisht dukjes dhe mundimit për kamuflim.
“Ka zëra të pakënaqur në PS, jo vetëm zoti Braçe me kritika të herëpashershme për çështjet e bujqësisë. Por edhe sulmet e nëndheshme të zotit Ahmetaj nga eksponentëve të PS, dhe e kundërta. Ndërsa zoti Rama e nxori Fatmir Xhafaj nga dera, Erion Veliaj e futi nga dritarja. Por është ende herët për të folur dhe mbetet për t’u parë. Por zoti Rama që dominon gjithë flukset e ndryshme në Partinë Socialiste”.
