Shpërthimi i një makine bombë, goditi një furgon policie të blinduar në Turqinë juglindore të premten, duke plagosur nëntë persona dhe duke ringjallur frikën për trazira të reja në rajonin kryesisht kurd.
Tetë oficerë policie dhe një person tjetër u plagosën në sulmin pranë qytetit të Dijarbakirit, tha zyra e guvernatorit lokal. Të nëntë personat u dërguan me urgjencë në spital si “masë paraprake”.
Në një deklaratë për mediat policia bën me dije se personat e lënduar janë jashtë rrezikut për jetën.
Forcat e sigurisë u dërguan menjëherë në rajon duke nisur një hetim në shkallë të gjerë.
Ministri i Brendshëm, Suleyman Soylu shkroi në Twitter se lidhur me shpërthimin janë arrestuar dy persona të dyshuar.
“Shtatë nga të plagosurit kanë dalë nga spitali. Të tjerët janë nën vëzhgim mjekësor dhe gjendja e tyre nuk është kritike. Kemi arrestuar personin që mori makinën me qira, e solli këtu dhe shpërtheu si dhe personin që drejtoi taksinë pas incidentit në qarkun Lice të Diyarbakirit“- deklaroi ai.
