Elidon Çela, pronar i agjencisë “Buon Aventura” i cili u arrestua në Portin e Durrësit me 516 mijë euro të padeklaruara, është liruar nga burgu në fillim të kësaj jave.
Çela është liruar me ‘detyrim paraqitje’ nga Gjykata e Apelit në Durrës. Ka qenë gjyqtarja Anita Mici ajo që ka liruar Elidon Çelën.
32-vjeçari deklaroi se paratë nuk vijnë nga veprimtari kriminale, por nga kursimet e familjes me biznese në Itali. Madje mësohet se ai është treguar i gatshëm t’i vënë në dispozicion autoriteteve shqiptare edhe faturat që sipas tij tregojnë burimin e parave që tentoi ti fusë në Shqipëri në shkelje të ligjit.
Çela dëshmoi në polici se paratë ishin të pastra dhe vinin nga biznese të familjes së tij. Ai tha se paratë i solli në Shqipëri për ti investuar në bujqësi.
“Kemi biznes, paratë janë kursime të familjes, do investoja në toka me qira dhe bujqësi. Askush nuk e dinte për paratë në autobus, kisha frikën e ndonjë grabitjeje”, tha ai.
Ndërsa për mallrat e tjera të cilësuara kontrabandë që iu gjetën në autobus, Elidon Çela ka pretenduar se ato janë dërgesa të emigrantëve për familjet në Shqipëri, për të cilat ka bërë deklarim në Portin e Barit.
“Mallrat janë të emigrantëve që jetojnë në Itali, i deklarova në doganën e Barit”, tha ai.
Kujtojmë se shuma e eurove u gjet e fshehur në tavanin e një autobusi të që lëvizte nga Bari në Shqipëri. Elidon Çela ishte shoferi dhe pronari i autobusit.
