Kreu i SPAK-ut, Arben Kraja e ka nisur mëngjesin e ditës së sotme duke postuar një fotografi me 3 kandidatët që do të garojnë për ta zëvendësuar në postin më të lartë të ngritur në kuadër të reformës në drejtësi me një mandat 3 vjeçar.
Gjatë një postimi në twitter, Kraja i uron suksese 3 kandidatëve, ndërsa thekson se SPAK në të ardhmen do të përmbushë detyrimet ligjore me efiktivitet të lartë.
“Suksese kandidatëve për Drejtues ! SPAK do të vazhdojë të përmbushë detyrimet ligjore me efektivitet dhe me të lartë”, shkruan Kraja. Kujtojmë se kreut aktual të SPAK-ut, Arben Krajës i përfundon mandati më datën 19 dhjetor.
KANDIDATET:
Adnan Xholi
Xholi ka qenë kandidat edhe në garën për kreun e Byrosë Kombëtare të Hetimit (BKH), mirëpo nuk i rezultoi fitues.
Adnan Xholi ishte kandidati i parë që dorëzoi zyrtarisht kërkesën.
Xholi ka një karrierë mbi 20 vjeçare në prokurori dhe punon në Prokurorinë e Përgjithshme prej viti 2013, ndërsa është konfirmuar në detyrë duke kaluar vettingun vitin e kaluar.
Edvin Kondili
Edvin Kondili ka qenë prokuror i Krimeve të Rënda dhe e kaloi me sukses vettingun në 7 qershor të vitit 2019. Prokurori që hetoi trafikun e 613 kilogramë kokainë që u kapën në një kontenier me banane në portin e Durrësit, rezultoi se nuk kishte probleme me pasurinë, pastërtinë e figurës apo aftësitë profesionale.
Kondili ka qenë edhe një nga tre kandidatët në garën e parë për kreun e SPAK-ut, ku garoi me drejtuesin aktual Arben Kraja dhe prokurorin Altin Dumani.
Asokohe ai ishte i vetmi që nuk kishte mbajtur asnjëherë poste drejtuese në organin e akuzës.
Altin Dumani
Altin Dumani ka qenë një nga tre kandidatët edhe në garën e parë për kreun e SPAK-ut, ku garoi me drejtuesin aktual Arben Kraja dhe Ervin Kondilin.
Ai më 10 qershor të këtij viti u zgjodh zëvendësdrejtor i Prokurorisë së Posaçme me një mandat 2-vjeçar, ndërsa emir i Dumanit ishte propozuar unanimisht nga kolegët.
Dumani vjen nga radhët e Prokurorisë së Apelit. Ai është një nga prokurorët që drejtoi i pari njësinë Task Forcë, ngritur vite më parë për të luftuar krimin e “Jakave të Bardha”.
Ai ka një karrierë prej 20 vitesh si prokuror, teksa detyrën ka nisur ta ushtrojë në mars të vitit 1999 si prokuror në Sarandë.
