Nga Boldnews.al
Çudirat në Shqipëri s’kanë të sosur, aq sa me të drejtë Shqipëria mund të quhet një “shtet kartoni”. Vendimet në këtë vend i marrin njerëzit e pushtetshëm, apo edhe ata që qendrojnë pas firmave që fitojnë tendera apo xhirojnë miliona euro. ALBtelecom ka qenë kompania “elitë” në Shqipëri, ndërkohë që prej vitit 2007, vit në të cilin u privatizua, ajo ka kaluar disa duar.
Megjithatë, shteti shqiptar ka rreth 17 % aksione në këtë kompani, pavarësisht se kohët e fundit është shitur dhe rishitur disa herë. Megjithatë, Ministria e Financave dhe Ekonomisë, s’ka asnjë vendimmarrje në këtë kompani, ndërsa nuk ka asnjë informacion nëse firma del apo jo me fitim. Dhe, a ka marrë ndonjëherë fitim shteti nga ALBtelecom?!
Por, sicc e përmendëm më sipër, shteti ka rreth 17 % të aksioneve, ndërkohë që paradoksalisht kjo firmë futet në tendera dhe fiton para publike.
Sipas dokumenteve që disponon BoldNews.al, Operatori i Shpërndarjes së Energjisë Elektrike ka zhvilluar një tender me objekt “shërbimi GRPS për PDA, tableta dhe matës për një periudhë 12 mujore”. Në tender kanë marrë pjesë operatori ekonomik “ALBtelecom sh.a” me vlerë oferte 16.809.600 lekë pa TVSH.
Dhe operatori ekonomik “Vodafone” me vlerë oferte 17.001.600 lekë pa TVSH. Nisur edhe nga oferta, fitues është shpallur “ALBtelecom sh.a”, ndërsa çudia në këtë rast qendron te aksionet shtetërore të kësaj kompanie.
BoldNews.al shfletoi dokumentet e Qendrës Kombëtare të Biznesit për firmën ALBtelecom. Rezulton se Posta Shqiptare ka 2.47 % të aksioneve. Ministria e Ekonomisë, Tregtisë dhe Energjetikës (emërtimi vjetër) ka 13.78 % të aksioneve të kjo firmë. Shumicën, e ka “4iG Albánia Korlátolt Felelössegü Társaság”, firmë hungareze e cila sapo e ka blerë nga një kompani turke. Ajo ka 80.27 % të aksioneve.
Por, pak vetë e dinë, por mijëra shqiptarë, kryesisht ish-punonjës gjatë kohës së privatizimit në vitet 2005-2007 janë aksionerë të firmës ALBtelecom. Ata (persona fizikë) kanë 3.48 % të aksioneve, por asnjëherë nuk kanë marrë dividend apo ndonjë të mirë materiale, përvecc dëngut me letra.
Pra, nga njëra anë kjo kompani vijon të fitojë tendera publikë, madje nga institucione shtetërore, dhe nga ana tjetër nuk “paguan” aksionerët, pasi gjithmonë “del me humbje”. Por, siç duket, OSHEE ose s’ka dijeni për këtë aktivitet, ose bën të paditurin, duke bërë “qokën” e radhës në “shtetin e kartonit”.
