Kreu i Partisë Demokratike, Sali Berisha i ka bërë thirrje publike Presidentit Joe Biden dhe qeverisë amerikane që të ndalojë ambasadoren e SHBA në Tiranë, Yuri Kim, në ndërhyrjet në sistemin e drejtësisë.
Gjatë fjalës së tij nga mbledhja e kryesisë së PD-së, Berisha tha se nuk mbështet Ramën në përplasjen me Kim për kreun e SPAK. Por, shtoi se sipas tij, ambasadorët duhet të respektojnë disa parime.
“Kjo është një republikë bananesh! Ky është një turp! Dhe unë i bëj thirrje presidentit të SHBA dhe qeverisë amerikane të ndalojnë ambasadoren e tyre për të trajtuar Shqipërinë në këtë mënyrë. Ne jemi një vend partner, ne jemi një vend që e duam Amerikën. Ne jemi një vend që besojmë në vlerat e saj, po s’mund të pranojmë kurrë banalizimin e këtij vendi. Ja ku është, betejën e ka me Edi Ramën, po as këtë se pranoj dot, jo se e dua Edi Ramën. Edi Rama është armik, por sepse s’mund të bëhet, ka një normë, ka disa parime dhe një vendi nuk ja bënë dot kurrë këtë”.
Berisha u shpreh kundër deklaratave të ambasadores, e cila e cilësoi betimin e Gent Ibrahimit si moment i rëndësishëm i zbatimit të reformës në drejtësi.
“Sot quante historike zgjedhjen e Gent Ibrahimit. A e dini se Gent Ibrahimi është i pari për të cilin ONM-ja ka qenë kundër përfshirjes së tij për shkak të karakteristikave në sistemin e drejtësisë. Gent Ibrahimi ka qenë dakord 100% që asnjë nga këta që merret me reformën e drejtësisë, të mos zgjidhet në organet e drejtësisë, se ishte në konflikt interesi. A e dini se Gent Ibrahimi, ka dhuratat më fabuloze në deklarimin e pasurive, nga prindërit. Në një kohë ku një tjetër prokurore, ja kishte mbledhur i ati rrogën, që të ja jepte për lehtësim, kur të fejohej a martohej, nuk ja quanin. Kurse këtij dhjetëra mijëra euro, dhuratë këtu, shtëpi aty e vilë atje. Dhe na thotë historike zonja, kujt ja thua ti këtë zonjë. Çfarë i quan shqiptarët ti. Kjo mund të ndodhë vetëm në republikën e bananeve. Unë jam i detyruar ti them gjërat, sepse kështu nuk bëhet. Për hir të Xhorxh Soros e bën këtë? Ne nuk kërkojmë gjë tjetër nga partneri ynë i madh, por standardin”, deklaroi Berisha.
Më tej, shtoi: “Çfarë standardi është ky kur na thua se qenka historike zgjedhja e Gent Ibrahimit, në një kohë kur ka shkrime dhe jo tonat, edhe para dy muajsh se këta kanë qenë të zotuar për shkak të konfliktit të interesit. Njëri prej tyre merr sa 100 pensionistë, që të mos kandidojnë në organet e drejtësisë. Dhe tani na del Ibrahimi historik. Pse e thotë dhe e bën këtë. Se e ka peng kryeministrin, e ka në dosje, e mban të lidhur. Askund nuk mund ta bëjë këtë, duhet të ketë respekt për shqiptarët. Këto të gjitha dëshmojnë se në çfarë situate jemi ne. Çfarë na mbetet ne, na mbetet të mbrojmë vlerat dhe parimet që i kemi në statutin tonë, në shpirtin, zemrën dhe mendjen tonë”.
