Nga Boldnews.al
Bashkia e Kurbinit ka hapur “thesin” për investime. Tërmeti ka sjellë një “lumë” parash, teksa me donacionet apo paratë e buxhetit janë bërë një mori projektesh, por sërish qyteti është në kaos me rrugë të pashtruara, pluhur, disa godina të prishura, të tjera që rindërtohen. Por, pavarësisht këtyre investimeve, Majlinda Cara, kryetarja e kësaj bashkie, ka menduar edhe për komoditetin e saj, pasi me paratë e taksave, apo atyre që vijnë nga buxheti i shtetit, po shpenzon plot 165 mijë euro për të mobiluar zyrat. Por këto mobilje zonja Cara i kërkon me standarte kombëtare dhe ndërkombëtare, të rehatshme.
Tavolina të rehatshme, karrige meshine dhe të forta, orendi të tjera cilësore. A thua sikur je në një “hotel me 5 yje” dhe jo në zyrat e shtetit, të cilat duhet t’u vijnë në shërbim dhe ndihmë banorëve vendas, me taksat e së cilëve blihen komiditetet.
Rrethi i Kurbinit ishte një nga më të prekurit nga tërmeti, ndërsa mijëra familje jetojnë ende në çadra, me qira apo te njerëzit e afërt, për shkak të zvarritjes së procesit të rindërtimit. Dhjetëra projekte kanë mbetur në mes, ndërsa të tjera janë në fazë fillestare, por që po zvarriten e zvarriten, megjithëse jemi future në vitin e 4 pas tërmetit shkatërrimtar. Megjithatë, kjo s’e ka penguar kryetaren Cara, të mendojë për komoditetin e saj. Sipas dokumenteve që disponon BoldNews.al, Bashkia e Kurbinit ka hapur tendering “blerje mobileri për godinën e Bashkisë Kurbin”, me një fond limit prej 16.541.373 lekë pa TVSH. Kohëzgajtja e kontratës është vetëm 30 ditë nga nënshkrimi i saj. Por, çfarë do të blihen?!
BoldNews.al shfletoi dokumentet e tenderit, teksa bashkia shkruan se mobiliet duhet të jenë cilësore. “Njohja me standartet kombëtare dhe ndërkombëtare të përmasave optimale të mobilimit të hapësirave publike me karakter social-shoqëror” thuhet në dokumente. Ndërkohë që radhiten edhe arsyet përse duhen këto mobilie, pasi “iu shërbejnë qytetarëve”. Në fakt, nuk bëhet fjalë për shërbime ndaj njerëzve të thjeshtë, por vetëm e vetëm për komoditetin e zyrtarëve që do të ulin të ndënjurat në to!
Ndërkohë, bashkia ka bërë edhe projekte për mënyrën sesi do mobilohet “hoteli me 5 yje”. Të gjitha karriget që do të blihen do të jenë e standarteve të larta, rrotulluese, meshine, me bazë mbështetëse të lartë. Ndërkohë, sipas projektit (në foton sipër), synohen të blihene dhe orendi të tjera, tepër cilësore.
