Pasi nuk reflektoi prej disa ditësh çmimin e ulur frikshëm të naftës në tregjet ndërkombëtare, kur në ditë të caktuara arriti edhe deri në 85 dollarë për fuçi, duke u njehsuar me periudhën e para shpërthimit të luftës, Bordi i Transparencës është mbledhur sot duke vazhduar “talljen” me shqiptarët.
Me synimin për të boshatisur xhepat e shqiptarëve, Bordi i ngritur nga kryeministri Edi Ramës ka vendosur që të rritë sërish çmimin e karburanteve, ndonëse në bursa nafta vijon të shitet me çmim të lirë.
Sipas vendimit të Bordit, 1 litër naftë do të tregtohet me 202 lekë/litër, pra 6 lekë më shumë. Gjithashtu edhe benzina shtrenjtohet me 3 lekë dhe nga sot do të kushtojë 178 lekë/litër, nga 175 që ishte deri tani. Ndërkohë që edhe çmimi i gazit është rritur dhe nga sot do të kushtojë 71 lekë për litër.
Çmimet e reja do të nisin të aplikohen nga pikat e karburanteve prej orës 18:00 të kësaj të premte. Kujtojmë që opozita ka kërkuar “shkrihen” në mënyrë urgjente të bordeve të cilat etiketohen si “komuniste” pasi abuzojnë me çmimet në dëm të xhepave të qytetarëve.
Vendim i Bordit të Transparencës:
Një litër naftë do të tregtohet me 6 lekë më shumë referuar vendimit të fundit të Bordit Transparencës.
Nafta do të tregtohet me 202 lekë, benzina me 178 lekë nga 175 lekë nga vendimi i mëparshëm. Po ashtu edhe gazi ka pësuar rritje, duke shkuar në 71 lekë për litër.
Sipas Bordit referuar të dhënave lidhur me bursën Platts të datës 13.12.2022, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 713, +36 nga data 08.12.2022, $/ Ton, ndërsa çmimi i Gazoilit/Diesel është 868, +71 nga data 08.12.2022, $/Ton. Kursi i këmbimit i BSH 109.88 ( – 1.56 nga dt 8)
Si rrjedhojë çmimet e vendosura janë:
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 202 lekë/litri, ndërsa i shitjes me shumicë jo më shumë se 190 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 178 lekë/litri, ndërsa i shitjes me shumicë jo më shumë se 166 lekë/litër.
Çmimi i shitjes me pakicë i nënproduktit gaz, të jetë 71 lekë/litri me pakicë dhe i shitjes me shumicë 59 lekë/litër për automjetet.
Çmimi i gazoilit për peshkim është vendosur 109 lekë/litër.
Çmimet hyjnë sot në fuqi, në orën 18:00.
