Nga Siobhan Robbins
Sapo filluan të shpërndaheshin informacione për linjën e re të ashpër të kryeministrit ndaj shqiptarëve që udhëtojnë ilegalisht drejt Mbretërisë së Bashkuar, kontaktova me njerëz që kisha takuar në udhëtimin tim të fundit të raportimit për të parë nëse kjo do t’i ndalonte ata të provonin përsëri.
“Never gonna stop” (Kurrë s’do ndalemi) ishte përgjigja e një njeriu që takova në një nga zonat më të privuara të vendit.
Ai kishte paguar kontrabandistët për ta sjellë në Angli në dy raste. Sapo mbërriti, ai punoi ilegalisht përpara se përfundimisht të zbulohej dhe dëbohej. Një tjetër kontakt ishte në Francë ku ai ishte kapur kohët e fundit duke u përpjekur të kontrabandohej me një kamion. Aktualisht ai pret të kthehet në Shqipëri .
Ai më tha: “Unë do të shkoj në vendin tim, në Shqipëri, pastaj do të përpiqemi përsëri të vijmë në Francë dhe pas në Britaninë e Madhe.”
Të dy këta burra vijnë nga pjesët më të varfra të një prej vendeve më të privuara në Evropë. Dhe ndërsa njoftimi i Rishi Sunak mund të nënkuptojë se shqiptarët që nuk marrin azil deportohen më shpejt, ai nuk zgjidh çështjet që i shtyjnë njerëzit të largohen nga vendi i tyre. Varfëria dhe mungesa e mundësive, janë arsyet kryesore që të rinjtë na thanë se do të shkonin.
“Ata nuk kanë asgjë për të humbur,” më tha një punonjës i një shoqate bamirësie sot ndërsa diskutonim njoftimin.
Për shembull, një hidraulik tha se mund të fitonte rreth 15 euro në ditë duke punuar në Shqipëri, kundrejt më shumë se 120 euro në Mbretërinë e Bashkuar.
Pra, cila është zgjidhja?
“Më shumë viza pune”, sugjeroi punëtori i shoqatës së bamirësisë që ka ndjekur lajmet për mungesën e fuqisë punëtore në fushat nga ndërtimi në bujqësi.
Pikëpamja e tij: Njerëzit do të vijnë gjithsesi, kështu që pse të mos i taksojmë dhe t’i detyrojmë të paguajnë në sistem si mijëra shqiptarë që tashmë jetojnë legalisht në MB?
Në të njëjtën kohë ju mbushni boshllëqet në tregun e punës, lehtësoni presionin mbi sistemin e azilit dhe ua hiqni pushtetin kontrabandistëve, arsyetoi ai.
Kjo ide do të ishte e vështirë t’u shitej disa votuesve konservatorë. Një gjë është e sigurt, pa mundësi më të mira në shtëpi, shumë do të vazhdojnë të kërkojnë një të ardhme jashtë Shqipërisë. /SkyNews
