Nga konferenca “Konsolidimi i Këshillit të Lartë Gjyqësor”, ku fokusin e vendosi te rezultatet por edhe puna që duhet të kryhet në kuadër të rritjes së besimit te reforma në drejtësi, ambasadorja amerikane Yuri Kim ka vendosur afate përsa i përket procesit të konsolidimit të Gjykatës së Lartë.
Duke qenë se për të plotësuar këtë institucion të drejtësisë duhen edhe 3 anëtarë, Kim tha se ky proces duhet të përmbyllet në tre muajt e parë të 2023.
“Sot jemi këtu për të festuar arritjet e Gjykatës së Lartë, do të rinovojmë mbështetjen tonë për drejtësinë. E di që jeni lodhur duke e dëgjuar nga unë, por reforma në drejtësi nuk është e lehtë dhe nuk është e shpejtë. Po shohim rezultate. Rezultate që i kupton çdo shqiptar si rezultate. Duhet të jeni krenarë për atë që keni arritur, keni nisur që të hetoni dosjet e prapambetura. Do të mbushni 3 vendet e Gjykatës së Lartë për të sjellë drejtësi për shqiptarët. Jemi krenarë për të bashkëpunuar me BE për reformën në drejtësi. është e drejta e shqiptarëve. Shikoni sa larg kemi arritur. Katër vite më parë ishte 1 gjyqtar në Gjykatën e Lartë. Tani na duhen edhe 3. Shpresoj që të gjenden 3. E di se është e vështirë, por mund të bëhet. Njerëzit thanë se do ishte e vështirë të mbushej GJK, por me vendosmëri u arrit brenda vitit që arrita unë në 2020. Kanë mbetur edhe 2 javë nga 2022, por shpresoj që vitin tjetër GJL t’i ketë të gjithë anëtarët. Koha ka ardhur, duhet të japim drejtësi për njerëzit. Duhet të gjejmë një rrugë. E di që duan t’i shohin gjyqet me njerëz dhe gati për të vendosur drejtësi, jo hakmarrje, por drejtësi. Ta dinë që kur të vijnë në gjyq, do të jenë të barabartë para ligjit”, tha ambasadorja.
Në vijim si për të përforcuar idenë e saj se rruga e duhur për të shkuar drejt BE-së është vendosja e drejtësisë në vend, Kim në formë batute tha se edhe “Enver Hoxha po rrotullohet në varr”.
Ajo vijoi duke nënvizuar se qytetarët shqiptarë kanë nevojë për gjyqtarë të drejtë dhe se SHBA-të mbështesin Shqipërinë në rrugën drejt progresit.
“Duhet të ketë drejtësi. Biznesmenët, duhet të dinë që kur të vijnë të blejnë pronat dhe kur të shkojnë në gjykatë duhet të dinë që gjykatësi do të vendosë në përputhje me ligjin. Kemi bërë përparim në fushën e mbrojtjes për herë të parë në histori. E kishit menduar këtë në ‘91 në ’97 apo gjatë diktaturës së Enver Hoxhës. Ai madje po rrotullohet në varr, kjo është e ardhmja. Shqipëria është Europë dhe kjo është ajo që duan SHBA-të dhe për këtë arsye vazhdojmë të besojmë dhe duam drejtësi. Do të kishin dashur që ne të kishim qenë të heshtur, por ne jemi miqtë tuaj dhe duam që ju të jeni të fuqishëm, të pasur të aftë, partnerët tanë. Një vend që vendet e tjera ta shohin dhe të thonë ia dolën mbanë. Ky është çasti, momenti, nuk është koha për t’u çlodhur apo për të thënë kjo mjafton, ne duhet të shtyjmë përpara sepse brezi i ardhshëm i shqiptarëve, amerikanëve, të mbështeten tek ju. Të përveshim mëngët së bashku , të rrisim ritmin, të vendosim gjyqtarët në pozicionet e tyre, të sigurohemi që vendimet që bëjmë do të na çojnë drejt të ardhmes që nuk do të na ngecin diku. Ne nuk mund të bëjmë pas, kjo është koha për të bërë përpara, KLGJ, Gjykatë Kushtetuese, institucionet e Vettingut, çdo anëtar duhet të bëni përpara drejt të ardhmes dhe gjithmonë së bashku”, nënvizoi ajo.
