Një tragjedi e vërtetë është ajo që ka ndodhur në Solihull të Britanisë së Madhe, ku 6 fëmijë të moshës nën 12 vjeç kanë rënë në një liqen të ngrirë në orët e vona të mbrëmjes së djeshme.
Sipas mediave vendase autoritetet kanë arritur të nxjerrin katër prej fëmijëve nga liqeni dhe gjendja e tyre paraqitet kritike pasi kanë pësuar arrest kardiak.
Komandanti i Shërbimit të Ambulancës së Midëllendsit Perëndimor, Cameron McVittie, tha se të katër ishin trajtuar me ndihmë mjekësore në vendngjarje nga ekipet e specializuara dhe ishin në një gjendje arresti kardiak kur dolën nga liqeni.
Ata u dërguan me urgjencë në spital dhe ishin në gjendje kritike pas mbërritjes, pasi iu dha mbështetje e avancuar e jetës gjatë udhëtimit. Dy nga fëmijët u dërguan në Spitalin e Fëmijëve në Birmingham ndërsa dy të tjerët u dërguan në Spitalin Birmingham Heartlands.
Një punonjës policie u dërgua gjithashtu në spital me një rast të lehtë hipotermie, pas aksionit të shpëtimit.
Ndërkohë vijojnë ende kërkimet për dy fëmijët e tjerë që dyshohet se kanë ndërruar jetë pasi ranë në liqenin në Babbs Mill Park, të Kingshurst, Solihull.
Dy fëmijët që nuk janë gjendur ende kanë qenë duke luajtur në akull kur ai u thye dhe ranë në ujë, ndërsa miqtë e tyre vrapuan në liqen dhe u përpoqën t’i ndihmojnë ata, duke përfunduar edhe vetë në ujërat e ngrira.
Raportohet se dëshmitarët u dëgjuan duke thirrur “nuk është e sigurt” në drejtim të grupit të fëmijëve, në mënyrë që ata të zbrisnin nga akulli.
Sophie, një punonjëse e mbështetjes së shëndetit mendor që u gjend në vendngjarje të dielën në mbrëmje, tha: “Unë arrita këtu me miqtë e mi në orën 14:45. Një grup të rinjsh luanin pranë liqenit i cili ishte plotësisht i ngrirë. Dy prej tyre kishin shkuar në liqen dhe njerëzit po i thoshin se nuk ishte e sigurt të qëndronin mbi akull”.
“Pastaj akulli u thye dhe këmba e njërit prej djemve hyri brenda. Tre të tjerët në breg më pas hynë për të ndihmuar dhe brenda pak minutash të gjithë ishin në telashe”, shtoi ajo.
Ajo pretendoi se një nga djemtë, një tetë vjeçar kishte vdekur në vend, por shërbimet e urgjencës refuzuan të komentojnë mbi ato raporte gjatë një konference për shtyp.
“Ai është nipi i një mikut tim. Ai nuk reagoi për dy orë dhe ata e kanë konfirmuar tani që ai ka ndërruar jetë”, tha ajo.
Duke përshkruar përpjekjet e shpëtimit, Sophie tha se pa katër fëmijë që tërhiqeshin nga uji i akullt dhe u transferuan në ambulanca.
Mbrëmë zhytësit specialistë të policisë u panë duke hyrë në ujë nën dritën e elektrikëve dhe helikopterëve sipër tyre, ndërsa operacioni i madh i kërkimit vazhdoi pa ndalim gjatë natës.
Në një konferencë për shtyp të dielën mbrëma, shërbimet e urgjencës konfirmuan se katër fëmijë po luftojnë për jetën në spital.
Kur u pyet në lidhje me raportet lokale se një fëmijë kishte vdekur, komandanti taktik i Shërbimit të Ambulancës së Midëllendsit Perëndimor, Cameron McVittie tha se nuk do të kishte ‘asnjë përditësim klinik’ për asnjë nga fëmijët deri në një moment të dytë.
