Një shtetase shqiptare ka shmangur deportimin nga Britania pasi një gjykatë pranoi se bashkëshorti i saj ishte përgjegjës për deklaratat e rreme lidhur me origjinën dhe të kaluarën e saj penale.
Bëhet fjalë për Fatmire Isaku, e cila kishte aplikuar tre herë për qëndrim ligjor pas mbërritjes në Britani, por kërkesat e saj ishin refuzuar pasi nuk kishte deklaruar historinë e saj të vjedhjeve.
Sipas mediave britanike, Isaku kishte pretenduar se kishte lindur në vitin 1958 në Prishtinë, për të përfituar status mbrojtjeje, ndërkohë që në të vërtetë kishte lindur në Tiranë në vitin 1952.
Në vitin 2011 ajo paraqiti një aplikim të katërt, i cili u pranua një vit më pas. Edhe tre fëmijët e çiftit përfituan shtetësinë britanike përmes natyralizimit.
Megjithatë, pasi autoritetet zbuluan se ajo dhe bashkëshorti i saj nuk ishin kosovarë, por shqiptarë, Ministria e Brendshme britanike u hoqi shtetësinë dhe nisi procedurat për deportim.
Isaku e apeloi këtë vendim në gjykatë. Fillimisht apeli i saj u rrëzua nga një gjykatë e imigracionit, por më pas çështja u rikthye për rishqyrtim nga një tjetër trup gjykues.
Gjykata pranoi se bashkëshorti i saj, Islami, ishte përgjegjës për gënjeshtrat dhe se Isaku kishte probleme serioze të shëndetit mendor, të cilat mund të kenë ndikuar në sjelljen e saj.
Gjykatësi Jonathan Perkins theksoi se provat mjekësore tregojnë se ajo kishte probleme të rënda të shëndetit mendor që ndikonin në jetën e saj të përditshme dhe se këto rrethana nuk ishin shqyrtuar siç duhet në vendimin e mëparshëm.
