Banorët e fshatit Kërçisht të Maqellarës, kanë dalë ditën e sotme në protestë, për mbrojtjen e burimit të ujit, nga një projekt i pamenduar i bashkisë, që u merr banorëve ujin për të furnizuar zona të tjera.
Gratë, të pajisura me hunj dhe shkopinj prej mëngjesit të sotëm, janë përballur me policinë, teksa thonë se ky burim është i vetmi ujë që kanë për të mbijetuar.
“Me na marrë ujin, ka kanë marrë shpirtin! Çfarë mbetet më?! Le të vdesim dne dhe le ta marrin pra!” tha njeri nga burrat e fshatit.
Banorët ankohen se Bashkia nuk ka arritur një marrëveshje me ta, pasi ujin që pretendon bashkia të marrë për Maqellarën e përdorin për vaditje. Ato nuk lejojnë marrjen e ujit, pasi në 30 vjet bashkia nuk ka bërë asnjë investim.
Aktualisht 15 mijë banorë të Maqellarës furnizohen me vetëm 1 orë ujë në 24 orë. Bashkia ka bërë projektin dhe ka vendosur të marrë një ujë me rrjedhje nga mali, sipër fshatit Kërçisht i Epërm, por banorët pretendojnë se është uji i tyre dhe e përdorin për vaditje, shkruan tch.
Këto burime përdoren nga tre fshatra për vaditje dhe për ujë të pijshëm, por edhe pse ka sasi të mjaftueshme, ato nuk lejojnë që uji të shkojë për furnizimin e Maqellarës dhe fshatrave poshtë.
Bashkia e Dibres kishte rënë dakord paraprakisht që gjatë tre muajve të verës uji të përdorej për vaditje, dhe pjesa tjetër të shkonte për ujë të pijshëm për Maqellarën.
