Gazment Kusta, një i shumëkërkuar i policisë që ishte në arrati prej 22 shkurtit kur u shpall në kërkim për dhunimin dhe kanosjen e Elvis Elezit në një lokal në zonën e Fushë-Krujës, është vënë në pranga nga policia.
Ai u arrestua këtë të enjte në Tiranë, teksa po lëvizte në zonën e quajtur “Kodra e Priftit”.
35-vjeçari njihet si person me precedent të theksuar kriminal dhe rezulton i dënuar më herët jashtë Shqipërisë për veprën penale “Trafikimi i lëndëve narkotike”.
Me 17 shkurt 2021, Kusta së bashku me tre persona të tjerë të maskuar u futën brenda një lokali me armë dhe shkope bejsbolli duke dhunuar Elvis Elezin, i cili ndodhej duke konsumuar një kafe.
Gjeneza e sherrit mes Kustës dhe Elezit dyshohet se nisi në Kroaci, pasi të dy kanë punuar bashkë aty në aktivitetin e shitjes së lëndëve narkotike dhe janë arrestuar duke vuajtur dënimin në të njëjtin burg.
Por pazaret mes tyre janë prishur dhe pasi janë kthyer në Shqipëri sherri vijoi sërishm derisa u dhunua Elezi në lagjen “Bakushe Visha” në Krujë.
Njoftimi:
Kontrolle të befasishme për kapjen e personave të shpallur në kërkim dhe vënien e tyre para përgjegjësisë ligjore.
Kapet dhe vihet në pranga 1 shtetas i shpallur në kërkim.
Shkon në 4 numri i personave të shpallur në kërkim, të kapur gjatë ditës së sotme.
Shërbimet e Forcës së Posaçme “Shqiponja”, në vijim të punës për goditjen e paligjshmërive, mbështetur në inteligjencë informative, mbi vendndodhjen e një shtetasi në kërkim, kanë organizuar punën për kapjen e tij.
Në Rrugën e Kokonozëve, shërbimet e Forcës së Posaçme “Shqiponja”, kanë ndaluar mjetin me drejtues shtetasin A. O., 32 vjeç, dhe pasagjer shtetasin G. K., 35 vjeç.
Pas verifikimeve të kryera ka rezultuar se 35-vjeçari ishte shpallur në kërkim për veprat penale “Kanosja”, “Plagosja e lehtë me dashje” dhe “Mbajtja pa leje dhe prodhimi i armëve, armëve shpërthyese dhe i municionit”.
Materialet i kaluan Prokurisë, për veprime të mëtejshme procedurale.
