Agresioni rus në Ukrainë duket se ka qenë nxitës i rëndësishëm për një qasje shumë më dinamike të Brukselit ndaj rajonit të Ballkanit Perëndimor. Edhe në deklaratën e liderëve të BE-së pas samitit me Ballkanin Perëndimor mbajtur më 6 dhjetor 2022 në Tiranë nënvizohet rëndësia e partneritetit strategjik midis BE-së dhe rajonit të Ballkanit Perëndimor” .
“BE thellon bashkëpunimin dhe nxit vendet e BP të bëjnë progres të shpejtë dhe të qëndrueshëm drejt përafrimit të plotë me Politikën e Përbashkët të Jashtme dhe të Sigurisë të BE-se, dhe të veprojnë në përputhje me të, duke përfshirë edhe me masat kufizuese të BE-së” thuhet në deklaratën e përbashkët të liderëve.
Por duhen dy vetë për të kërcyer tango dhe që procesi të jetë sa më I shpejtë BE u kujton vendeve të Ballkanit Perëndimor dhe Shqipërisë vlerat themelore të sundimit të ligjit, ndarjen e pushteteve, qeverisje e mirë, media e lirë dhe lufta kundër krimit dhe korrupsionitm
“Bashkimi Evropian nënvizon nevojën për përpjekje të qëndrueshme në luftën kundër korrupsionit dhe krimit të organizuar, për rritjen e mbështetjes për qeverisjen e mirë, për të drejtat e njeriut, barazinë gjinore dhe për të drejtat e personave që u përkasin pakicave.
Besueshmëria e këtyre angazhimeve varet nga zbatimi kuptimplotë i reformave të nevojshme dhe nga ndërtimi i një historiku të qëndrueshëm i mbështetur në komunikimin publik të qartë dhe konsekuent në interes të popullit të tyre.
Një shoqëri civile e fuqizuar dhe mediet e pavarura dhe pluraliste, në respekt të plotë të lirisë së shprehjes, janë përbërësit vendimtarë të çdo sistemi demokratik dhe ne përshëndetim dhe mbështetim rolin që ato luajnë në Ballkanin Perëndimor.”
Gjithashtu në pikën 7, BE rikujton rëndësinë e vazhdimit të reformave, “si për të mirën e qytetarëve ashtu edhe si bazë për mbështetjen e vazhdueshme të BE-së, veçanërisht në fushën e sundimit të ligjit, dhe në veçanti të atyre reformave që lidhen me pavarësinë dhe funksionimin e gjyqësorit dhe luftën kundër korrupsionit dhe krimit të organizuar.”
Po kështu ajo që të bie në sy është se BE-ja vazhdon të mbështetë plotësisht angazhimin e partnerëve të Ballkanit Perëndimor për bashkëpunimin rajonal përfshirës dhe forcimin e marrëdhënieve të fqinjësisë së mirë edhe me Shtetet Anëtare të BE-së por në asnjë rresht nuk përmendet termi “Ballkani i hapur”
Marrë nga Oranews
