Kryetari i PD-së, Sali Berisha akuzoi direkt kryeministrin Edi Rama për sulmin e ndodhur më herët gjatë tij gjatë protestës.
“Le t’i themi policisë; liroje fatkeqin, liroje. Sepse, ai është një mjeran, që ka shitur veten”, apeloi Berisha nga foltorja e protestës.
“Dhe përpiqen sot, ta lidhin meqenëse është një samit, e vërteta e pamohueshme, liderë të krishterë, me bishta që çojnë nga Turqia apo ndonjë vend tjetër. Nuk kanë asgjë të përbashkët. Ka vetëm një autor, ky është Edi Rama. Ka vetëm një arkitekt, është Edi Rama. Atë lirojeni dhe mos shpërndani dokrra dhe përralla, se autori i vërtetë është i ulur në samit si kryekriminel i Ballkanit dhe Europës”, shtoi Berisha.
“Ky regjim i shëmtuar, bëri gjithçka që protesta jonë të mos zhvillohej. Kaloi edhe në një akt, me të cilin dëshmoi karakterin prej krimineli Edi Rama. Ai që e organizoi, zgjodhën si në të gjitha rastet, një person që mund të kryejë çdo gjë, dhe e bënë si masë të fundit, pasi e panë që u lëshuan nga katër anët e Tiranës dhe Shqipërisë në këtë protestë që historia do e shkruajë me germa të arta në historinë e protestave të qytetarëve të lirë. Ju keni ardhur me dhjetëra dhe qindra herë në protesta, por ju garantoj se kjo e sotmja, ka qenë për secilin prej jush, kryeprotesta e jetë”, tha po ashtu në një prononcim për mediat nga shkallët e selisë blu pas përfundimit të protestës.
Gjatë fjalës së tij nga podiumi i protestës, Berisha tha se samiti i sotëm nuk mund të konsiderohet si një mbështetje për Edi Ramën. Sipas tij, ky samit është një mbështetje e madhe për shqiptarët dhe PD-në.
Kreu i PD u shpreh po ashtu se Shqipëria është sot në rrezik ekzistencial për shkak të votës së vdekur, ndërsa shtoi se pa votën e lirë, nuk ka dhe nuk do ketë stabilitet në Shqipëri.
“Narkoeurot përdoren për çdo krim”, theksoi Berisha.
“Mesazhi im për liderët e BE është ky, në Shqipërinë e vërtetë, në pushtet është mafia”, tha kryedemokrati.
Mediave të huaja i kërkoi të investigojnë “krimet e Ramës”, duke u shprehur i sigurt se “do gjenden gjëra tronditëse”.
Duke u rikthyer te samiti BE-Ballkani Perëndimor, Berisha tha se me këtë samit merr goditje fatale projekti i Ballkanit të Hapur.
Në fund të fjalimit të tij, Berisha u shpreh se “ne jemi misionarë”, ndërsa paralajmëroi se “beteja të mëdha na presin”.
