Sulmi i sotëm ndaj kreu të Partisë Demokratike Sali Berisha është komentuar nga aleati i tij, Ilir Meta në një konferencë për mediat dhënë nga selia e Partisë së Lirisë.
Duke e konsideruar një atentat mafioz nga ana e kryeministrit Edi Rama, Meta falenderoi Berishën për mënyrën si menaxhoi situattën dhe pa u ndalur u ngjit në podium për të vazhduar me protestën e opozitës.
“Duke falënderuar qytetarët dua të shpreh një falënderim për liderin e PD-së, profesor doktor Sali Berishën për atë menaxhim të shkëlqyer që i bëri atentatit mafioz të orkestruar nga Edvin Kristaq Rama që kishte vetëm një qëllim, të devijonte një protestë paqësore në një manifestim dhune me viktima”, tha Meta.
Në vijim ai shtoi se kryeministri me aktin e sotëm tregoi fytyrën e tij të vërtetë prej dhunuesi dhe armiku të paqes e sigurisë në Shqipëri.
“Është e qartë dhe në dritën e diellit se sot Rama në përpjekjet e tij më ekstreme të papara ndonjëherë për të provokuar dhe fajësuar opozitën si shkaktare të dhunës nxorri fytyrën e tij të vërtetë që nuk ka diplomat e ambasador, nuk ka mafioz ndërkombëtar të korruptuar që mund t’ia ndryshojë dot. Sot Edi Rama u tregoi gjithë shqiptarëve, se është armiku më i madh i paqes sociale në vend, që është pasuesi më bastard i atij regjimi i cili i shkaktoi vendit aq shumë drama e viktima për 5 dekada. Ai është pengmarrësi i të ardhmes evropiane të vendit, për shkak të pengmarrjes së tij nga organizatat kriminale jo vetëm në kontinent por edhe përtej tij. Opozita tregoi se ka gjithë vizionin dhe qëndrueshmërinë e duhur për ta shporrur këtë sekt kriminal, që përdhos kushtetutën”, u shpreh kreu i PL.
