Kryeministri Edi Rama është pyetur në konferencën e përbashkët për mediat me Presidentët e Këshillit të Europës dhe Komisionit të Europës, për sulmin që ndodhi mesditën e sotme ndaj kreut të Partisë Demokratike, Sali Berisha.
“Përgjigja ime është dhënë që prej një ore. S’kam asgjë për të shtuar. Është në faqen e qeverisë”, u shpreh Rama.
Kujtojmë se kreu i qeverisë reagoi për ngjarjen gjatë kohës kur Berisha po realizonte konferencën për mediat nga selia blu dhe e akuzoi shefin e qeverisë si ideator të dhunës ndaj tij.
Ndërkohë në njoftimin e Kryeministrisë thuhet se Rama dënon pa asnjë ekuivok aktin e pajustifikueshëm e të patolerueshëm të dhunës mbi organizatorin dhe udhëheqësin e protestës së sotme.
“Kryeministri i Shqipërisë Edi Rama dënon pa asnjë ekuivok aktin e pajustifikueshëm e të patolerueshëm të dhunës mbi organizatorin dhe udhëheqësin e protestës së sotme! Dhuna s’ka qenë, s’është e s’do jetë kurrë një mjet për të adresuar çfarëdo çështje apo shqetësimi dhe kushdo e përdor këtë mjet duhet të përballet me të gjithë forcën e ligjit.“
