Policia ka identifikuar dhe ka shpallur në kërkim autorin e dyshuar të plagosjes me armë në lagjen nr.17 në Durrës.
Uniformat blu bëjnë me dije se është shpallur në kërkim një 28-vjeçar me iniciale G.P, pasi dyshohet se plagosi shtetasin Daniel Bushi i cili u paraqit vetë në spital për kurim për shkak të plagës së shkaktuar nga një armë zjarri.
Policia e Durrësit njoftoi se: “Në orët e para të mëngjesit ka shkuar në spital për ndihmë mjekësore, i plagosur me armë zjarri në lagjen “Nr 17” Durrës, shtetasi Daniel Bushi, 40 vjeç. Pas njoftimit të marrë, shërbimet e Policisë kanë shkuar menjëherë në vendngjarje dhe nga veprimet e shpejta hetimore paraprake të kryera ka rezultuar se 40 vjeçari dyshohet se është plagosur nga shtetasi G.P., 28 vjeç”.
Shërbimet e Policisë vijojnë kontrollin e zonës për kapjen e autorit. Grupi hetimor nën drejtimin e Prokurorisë së Rrethit Gjyqësor Durrës ndodhet në vendngjarje dhe po punon për sqarimin dhe zbardhjen e plotë të rrethanave të ngjarjes.”
