Kreu i Partisë Demokratike, Sali Berisha ka deklaruar se protesta e 6 dhjetorit nuk prish imazhin e Shqipërisë, ditën e Samitit të BE ku në Tiranë do të zbarkojnë liderët europianë.
Në një deklaratë për mediat, Berisha i bëri thirrje qytetarëve që pa dallime partiake të dalin në shesh pasi protesta është niveli më i lartë demokratik në mënyrë që t’u dëgjohet zëri.
“Qytetarët kanë të drejtë të dëgjohen dhe protesta është një nga mënyrat më të fuqishme që ata të dëgjohen. Për çdo qytetar, pavarësisht nga bindjet e tij, protestat janë shprehje e lirisë dhe ushtrim i lirisë nga qytetari. Vetëm qytetarët e lirë që vendosin të mbrojnë lirinë dhe të drejtat e tyre, protestojnë, kurse njerëzit e nënshtruar thonë ç’më duhet mua, ulin kokën dhe heshtin. Qytetarët kanë të drejtë të dëgjohen dhe protesta është një nga mënyrat më të fuqishme që ata të dëgjohen. Protesta është pra zëri i qytetarëve, është zëri juaj. Protestat kundër qeverisë janë jetike, janë domosdoshmëri për të ruajtur lirinë, për t’i bërë presion qeverisë për të mos abuzuar me pushtetin e saj.
Por unë sot dua të shtroj pyetjen për çdo qytetar: cila është e keqja e protestës? Ç’e keqe do na ndodhë nga protesta? Asnjë e keqe, asgjë e keqe. Vetëm të mira, vetëdijësim, presion, kërkim llogarie, demonstrim se guxojmë si njerëz të lirë. Të këqijat ndodhin kur njerëzit nuk reagojnë, kur mërmërsin se ç’më duhet mua dhe heshtin. Të këqijat ndodhin kur qeveritë manipulojnë opinionin ndërkombëtar për të ruajtur korrupsionin e tyre dhe keqqeverisjen e tyre. Zëri i qytetarëve në rrugë vetëm e forcon demokracinë dhe lirinë, vetëm e kufizon të keqen dhe keqqeverisjen”, deklaroi fillimisht Berisha.
Nga Saimir Tahiri deri tek afera e inceneratorëve, Berisha rendit disa nga arsyet që sipas tij i “nxijnë faqen” Shqipërisë në sytë e Bashkimit Europian.
“Në protestën e 6 dhjetorit ne nuk dorëzohemi po luftojmë për vlerat tona dhe europiane dhe kurrë anëve të zeza të kësaj qeverie që i ka të pamundur , zëri ynë në protestë nuk pajtohet me Edi Ramën. Populli opozitar në Shqipëri do të luftojë për vlerat demokratike. Protesta e 6 dhjetorit është një kundërsulm i Edi Ramës ndaj imazhit të Shqipërisë. Imazhin e vendit nuk e prish protesta por imazhin e nxin korrupsioni i Edi Ramës dhe vendosja e monizmit të plotë nga droga. Imazhin e Shqipërisë e nxin fabrikat e laboratorët e drogës të PS, imazhin e prish Samimir Tahiri pasi trafikonte drogë. Imazhin e prish Edi Rama , Arben Ahmetaj, Erion Veliaj, që kanë vjedhur qindra miliona euro me skemën e inceneratornëve. Imazhin e Shqipërisë e prish përvetësimi i portit të Durrësit dhe arabi i tij për interesin e tij. Imazhin e Shqipërisë e prishin paratë e pista”, tha Berisha.
