Një ngjarje makabër raportohet të ketë ndodhur në qytetin Bédoin (Vaucluse) të Francës.
Sipas mediave vendase, dy foshnja janë gjetur të enjten, të vdekura dhe të ngrira në një frigorifer në shtëpinë e një gruaje, e cila është arrestuar nga policia.
Siç është shprehur për AFP prokurorja publike e Carpentras, Helene Mourges “faktet janë të karakterit kriminal”.
Ajo ka sqaruar se zbulimi ka ndodhur pas “thirrjes së një personi të tretë” nga xhandarmëria.
Në këtë fazë të hetimit është e pamundur të përcaktohet mosha apo gjinia e foshnjave të gjetura të ngrira, si dhe lidhjet e tyre të mundshme mes tyre apo me gruan e arrestuar nga policia.
“Është e vështirë në këtë fazë të jepen detaje”, këmbënguli Mourges, duke shtuar se “janë marrë mostra” për të mësuar më shumë rreth dy fëmijëve.
“Autopsia do të na tregojë më shumë”, shtoi prokurorja duke saktësuar se ajo mund të bëhet vetëm brenda “një afati të caktuar, sepse janë marrë të gjitha masat për të ruajtur të gjitha provat shkencore”.
Hetimi iu besua brigadës së xhandarmërisë Carpentras, por lidhja mes personit që thirri xhandarët dhe gruas së arrestuar nga prokuroria nuk është saktësuar ende.
Prokurorja publike e Carpentras bëri të ditur se më shumë detaje për këtë dosje do të japë mëngjesin e së premtes, përmes një komunikate për media.
