Tre persona u arrestuar dhe dy të tjerë u proceduan penalisht nga policia e Fierit që ka sekuestruar një sasi prej 176 kg kanabis.
Gjatë operacionit “Baltëz” u arrestuan: Zylyftar (Pëllumb) Vizani, 44 vjeç, Paris Vizani, 22 vjeç dhe Esat Veizi, 27 vjeç, banues në Baltëz, Fier.
Gjithashtu, u referuan materialet në Prokurori dhe nisi procedimi në gjendje të lirë për 2 shtetas të mitur, 14 dhe 16 vjeç, po ashtu banues në Baltëz.
Aksioni
Aksioni u zhvillua nga Seksioni për Hetimin e Narkotikëve të DVP Fier dhe Komisariati i Policisë Fier, në bashkëpunim me Forcën e Posaçme “Shqiponja”. Burime zyrtare nga policia konfirmuan se erdhi “bazuar në inteligjencën informative, për një sasi të madhe lënde narkotike që e posedonte një shtetas, në ambientet përreth banesës së tij, në fshatin Baltëz”.
“5 personat (e arrestuar dhe proceduar), në momentin që kanë parë shërbimet e Policisë, që kanë shkuar për kontroll, kanë tentuar të hedhin thasët me lëndë narkotike, në lumë, por janë kapur në flagrancë”, njoftoi policia.
Janë sekuestruar në cilësinë e provës materiale 17 thasët e mbushur me lendë të dyshuar narkotike kanabis, me peshë totale 176 kg.
Gjithashtu, në cilësinë e provës materialet u sekuestruan 2 peshore, gërshërë, 3 aparate celulare dhe pajisje të tjera, që sipas bluve, i shërbenin kësaj veprimtarie kriminale.
Materialet i kaluan Prokurorisë pranë Gjykatës së Shkallës së Parë Fier, për veprën penale “Prodhimi dhe shitja e lëndëve narkotike”, kryer në bashkëpunim, mbyllet njoftimi i policisë.
