Anëtarësimi i Maqedonisë së Veriut në Bashkimin Europian Brenda vitit 2030 nuk është i sigurt. Qëndrimi i mbajtur më parë nga kryeministri Dimitar Kovaçevski nuk u konfirmua nga presidenti gjerman, Frank–Walter Steinmeier.
“Shteti juaj gjendet para një vendimi të rëndësishëm, nëse do e hapë rrugën për çeljen e kapitujve nëpërmjet ndryshimeve kushtetuese… Gatishmëria juaj pragmatike për zgjidhje të kontestit me Bullgarinë është impresionuese dhe ju siguroj se në fund do t’ia vlejë. Unë dua që procesi i integrimit të ndodhë sa më shpejtë, por nëse kjo do ndodhë ne vitin 2030 këtë për momentin nuk mund ta thotë asnjë politikan nga Maqedonia e Veriut, Gjermania ose nga Bashkimi Evropian. Por duhet të vazhdoni përpjekjet”, tha presidenti gjerman.
Presidenti i Maqedonisë së Veriut Stevo Pendarovski kërkoi mbështetje nga faktori ndërkombëtar për ruajtjen e entuziazmit pro evropian ndërsa i bëri thirrje opozitës maqedonase që të mbështesë ndryshimet kushtetuese për futjen e pakicës bullgare në Kushtetutë.
“Në një periudhë kur besimi në gjithë rajonin për eurointegrimet është i lëkundur, në këtë periudhë të ndjeshme na nevojitet ndihmë nga demokratët e mëdhenj evropian, nga bartësit e idesë për një kontinent të bashkuar. Në këtë kontekst, mbështetja pa rezervë e Gjermanisë ka një rëndësi shumë të madhe për ne, sidomos pas riaktivizimit të Procesit të Berlinit ku Gjermania luan rolin kyç”, u shpreh Stevo Pendarovski, president i RMV-së.
Presidenti gjerman dhe presidenti maqedonas theksuan edhe rëndësinë e procesit të Berlinit dhe nevojën për iniciativa rajonale ekonomike dhe infrastrukturore.
Të enjten, presidenti gjerman do të nisë vizitën dy ditore në Shqipëri.
