Një aksident i rëndë ka ndodhur mëngjesin e sotëm në autostradën Durrës-Tiranë. Një automjet është përplasur me trafikndarësen e për pasojë dy pasagjerët kanë humbur jetën.
Silva Gjergji nga Rubiku është një nga vajzat e cila humbi jetën. 26-vjeçarja ishte në mjet së bashku me një vajzë tjetër (viktimë e paidentifikuar ende) dhe drejtuesin e mjetit, Arbër Tivari.
Të rinjtë po udhëtonin drejt kryeqytetit dhe dyshohet se shpejtësia në drejtim është shkak i aksidentit, po nuk përjashtohet as ndonjë rrethanë e pazakontë në rrugë që e ka detyruar shoferin të devijojë dhe të humbasë kontrollin mbi drejtimin e mjetit.
Policia i ka komunikuar masën e arrestit të riut nga Durrësi që ndodhet në gjendje të rëndë në spitalin e traumës në Tiranë.
Tivari nga Durrësi ka qenë duke drejtuar automjetin tip Ford Ka me targë AA014ZE nga Durrësi në drejtim të Tiranës, kur ka dalë nga rruga duke marrë me vete edhe barrieren metalike anësore e cila është palosur brenda në kabinë.
