Një video nga viti 2010, kur në opozitë për përmbytjen thoshte se “nuk po ndodh për shkak të zotit” dhe se “Shkodra stërpërmbytet e do vijojë të përmbytet se nuk qeveriset, pasi nuk ka në këtë vend një qeveri të shqiptarëve, por një çetë të kusarëve”, ishte ajo që i përplasi sot në fytyrë deputeti i Partisë Demokratike, Ferdinand Xhaferraj, kryeminisrit Edi Rama.
Gjatë interpelancës që ishte kërkuar nga deputeti i Durrësit me shefin e qeverisë, Rama akuzave për keqmenaxhimin e Kaskadës së Drinit dhe përmbytjen e Veriut prej tyre, iu kundërpërgjigj duke thënë se janë mediat dhe opozita që e tjetërsojnë panoramën.
“Nëse unë marr kamerën e iPhone-t tim me qëllim në një vrimë të vogël me ujë këtu në të djathtë të korridorit, mund të stimuloj një përmbytje globale, por realiteti është tjetër dhe këtë herë nuk flas unë, por Bashkia e Shkodrës”, tha Rama.
Në vijim, kryeministri hezitoi të pranonte shpalljen e gjendjes së emergjencës për Shkodrën, Lezhën dhe Durrësin, duke i krahasuar përmbytjet e sotme me ato të 2010, e duke thënë se situata nuk është e njëjtë.
“Meqë do ta marr fjalën dhe njëherë tjetër, përgjigjen se ku është çeta e kusarëve do t’ua jap shumë të plotë sot. Ndërkohë që për sa i përket çështjeve të ngritura prej jush në parantezën e bërë lexova që shqetësimi juaj kryesor dhe pyetja juaj kryesore ishte pse nuk shpallet gjendja e emergjencës. Gjendja e emergjencës ka një kuadër të plotë ligjor, kritere të përcaktuara që nuk kanë asnjë lidhje me situatën e aktuale. Nuk dëshiroja të hyja në krahasime, por meqë hytë ju në krahasime, i qëndroj asaj që ndatë bujarisht me publikun sepse janë faktet që flasin shumë qartë dhe ai sinkron është nxjerrë nga një moment katastrofik për Shkodrën dhe për gjithë zonën e perëndimit si rezultat i keqadministrimit t skandaloz, kriminal, korruptiv të Kaskadës, ajo ishte e vërtetë dje, është e vërtetë sot. Ndërkohë pikërisht për ta ilustruar sinkronin dhe për t’ju thënë që Rama junior dhe Rama senior është i njëjti person, Shkodra dihet botërisht që nuk influencohet nga qeveria jonë”, u shpreh kreu i qeverisë.
Rama hodhi pas krahëve përgjegjësinë e tij dhe të KESH që importonte energji kur Vau i Dejës dhe Komani ishin të tejmbushur dhe u detyrua që prej përllogaritjeve të tyre të gabuara të hapnin portat për të shkarkuar ujin, për të cilin kryeministri një muaj pa pushim iu lut Zotit që ta sillte në formë shiu.
“Këtë herë nuk ka asnjë lidhje me kaskadën, fare, zero, zero dhe 4 mijë që sollët ju nuk është vetëm për Shkodrën, por për gjithë zonën dhe Lezhën. Në Durrës ka pasur një pasqyrë të qartë se çfarë ka bërë dhe që shikohet sa herë vjen i njëjti test me shi të rrëmbyeshëm të punës së bashkisë dhe kryetares”, deklaroi ai.
