Parlamenti Europian miratoi strategjinë e re për zgjerimin e Bashkimit Europian, duke i dhënë një goditje të fortë projektit për Ballkanin e Hapur, ku janë investuar kryeministri i Shqipërisë Edi Rama dhe Presidenti i Serbisë Aleksandër Vuçiç.
“Parlamenti Evropian kërkon rritjen e përpjekjeve drejt marrëdhënieve të mira fqinjësore, bashkëpunimi gjithëpërfshirës dhe efektiv socio-ekonomik në nivel rajonal dhe solidariteti në vendet e anëtarësimit në BE, si dhe bashkëpunimi ndërkufitar rajonal ndërmjet shteteve anëtare të BE-së dhe vendeve partnere përgjatë kufijve të jashtëm të BE-së; të rrisë konkurrencën ekonomike dhe kohezionin social në Ballkanin Perëndimor përmes reformave strukturore dhe duke vendosur bashkëpunim ekonomik rajonal që është i pranueshëm për të gjashtë vendet, duke ndjekur përafrimin e mëtejshëm me standardet dhe acquis (ligjet) e BE-së dhe duke kontribuar në procesin e integrimit në BE”, thuhet në raportin e PE.
Në konstatimet e saj mbi “Open Balkan”, PE argumenton se nisma nuk bazohet në rregullat e BE-së dhe nënvizohet se ka rezerva të forta për projekte të Ballkanit Perëndimor që shkojnë përtej Procesit të Berlinit.
“Në këtë kontekst, Parlamenti Evropian mirëpret marrëveshjet e fundit në Samitin e Procesit të Berlinit, në veçanti përfundimin e marrëveshjeve rajonale të lëvizshmërisë për lirinë e udhëtimit me karta identiteti dhe njohjen e diplomave akademike dhe certifikatave profesionale; shprehin rezerva të forta për çdo iniciativë rajonale të bashkëpunimit ekonomik që nuk përfshin të gjashtë vendet e Ballkanit Perëndimor dhe nuk bazohet në rregullat e BE-së, siç është nisma e Ballkanit të Hapur”, theksohet më tej.
Rezoluta në fjalë u miratua ditën e djeshme në Parlamentin Europian duke marrë 502 vota pro, 75 kundër dhe 62 abstenime.
Ajo shpreh në këtë mënyrë për të parën herë me një dokument zyrtar të Bashkimit Europian qëndrimin e 27 vendeve anëtare për mospranimin e “Open Balkans”, iniciatore dhe frymëzuese e së cilës janë qeveritë e Tiranës, Beogradit dhe Shkupit.
Rezoluta me 15 faqe ishte hartuar nga euro deputeti kroat Tonino Picula, që i përket grupit Social dhe Demokrat dhe nuk përbënte të vetmen “shuplakë” nga BE, pasi u miratua përkrah një tjetër rezolute që dënon ashpër qëndrimin që Serbia mban ndaj Rusisë dhe I kushtëzon Beogradit zyrtar negociatat për anëtarësim në vijim.
Ajo thekson se negociatat me Serbinë duhet të përparojnë “vetëm nëse vendi përafrohet me BE-në dhe u bashkohet sanksioneve kundër Rusisë dhe bën përparim të rëndësishëm në reformat e lidhura me BE-në”.
