Shemsi Prençi, ish-drejtor i Emergjencave Civile u përplas në “Now me Erla Mëhillin” me zv. ministrin e Bujqësisë, Arian Jaupllari sa i takon situatës së krijuar nga përmbytjet.
Prençi akuzoi Jaupllarin se s’ka lexuar as vendimin e qeverisë që një hidrovor duhet të ketë furnizim me energji elektrike nga dy a më shumë linja.
Ai tha se përveç kësaj duhet të ketë dhe burim energjie alternative, pra gjenerator, koment që nxiti reagimin e Jaupllarit i cili e pyeti se përse nuk e ka vënë ai në kohën që ishte në detyrë.
I gjithë debati u nxit nga deklarata e Prençit se gjatë kësaj kohe hidrovoret nuk kanë punuar. Sipas tij ka qenë vetë ministrja dhe prefektja e Shkodrës që deklaruan se bënë të mundur rikthimin në punë të hidrovoreve sepse prej 24 orësh kishte mungesë të energjisë elektrike.
Një koment i tillë nuk u pranua nga Jaupllari i cili tha se bëhet fjalë për dezinformim dhe hidrovoret nuk kanë ndaluar punën në asnjë moment.
