Nga Shkodra e përmbytur ku udhëtoi me urgjencë paraditen e sotme, kreu i Partisë Demokratike Sali Berisha ka mbajtur një konferencë të përbashkët për mediat me kryebashkiakun Bardh Spahia.
Berisha nuk i ka kursyer akuzat në drejtim të kryeministrit Edi Rama, i cili mori guximin t’i përgjigjej në rrjetet sociale pas fjalës së liderit të opozitës gjatë ndalesës në fshatin Kuç, ku tha se Rama dhe Balluku janë verbuar nga paraja, duke hapur digat e HEC-ve të Komanit dhe Vaut të Dejës, në një kohë që shesin energji me çmim 4 herë më të ulët se vlera e tregut.
“Hajduti që bërtet kapeni hajdutin dhe këta kanë vjedhur aq shumë sa veç vjedhje shohin pas çdo gjëje”, ishte postimi i Ramës në Tëitter, të cilit Berisha iu përgjigj duke thënë se shefi i qeverisë është hajduti më i madh në historinë e kombit.
Berisha tha se gazetarët dhe qytetarët nuk mund të kontrollojnë dot tenderat e KESH, aty ku po vidhen miliona euro me kontratat për blerje energjie, pasi qeveria ndërtoi platformën dixhitale për t’i fshehur ato.
“Përgjigja ime është ai në çdo akt që firmos fap fap fap vetëm vjedh. Vjedh, vjedh. Ai shqiptarëve u ka paraqitur vetëm një argument, si mund të vjedh një burrë 2 metra. Janë afera njëra pas tjetrës që e nxjerrin hajdutin më të madh të kombit shqiptar, që kur është themeluar, unë nuk dua por vetëm me energjinë të ndalem. A keni pare, keni marrë pjese, kontrolluar një tender të vetëm për energjinë, përpara një zv ministër i merrte gazetaret dhe hapte zarfet para juve. Sot çfarë ndodh me KESH-in? Asnjë qytetar nuk kontrollon asnjë tender te KESH. Para një viti hapen tender për një platforme dixhitale prokurimesh, ne shkurt dështoi tenderi. Ne korrik na shfaqet si fantazme platforma dixhitale, askush se di kush e ndërton. Është një nga hajdutet që merr pjesë ne vjedhjet e KESH, që asnjë gazetar dhe qytetar të mos marre vesh kurrë se kush merr pjesë në tender. Kanë hapur portat e kaskadës verës, kanë shitur me 40 euro megavat klientëve dhe e kane eksportuar me 140 euro megavatin. Rama të behet burrë e ti çoj në gjykatë, në SKAP-in e tij, e kontrollon fund e krye. Vet është i zhytur deri në vesh”, tha Berisha.
Ndërkohë, kryebashkiaku i Shkodrës u ndal te gjendja në terren duke thënë se ka indicie se po përkeqësohet dhe se jeta e banorëve të zonave të përmbytura është në rrezik.
“Ka nevojë jetike urgjente pasi gjendja nuk po përmirësohet por përkeqësohet. Kemi pasur nevojë për shtim konsistent të burimeve njerëzore dhe logjistike, shtim të personelit ushtarak dhe mjeteve ushtarake dhe ardhjen me urgjencë te forcave te emergjencave civile me pajisjet e tyre. Situata vazhdon të mbetet serioze sa i takon Guri i zi, fshati Kuç, në disa lagje të qytetit, Ajasëm dhe Bahcallëkut. Ka ujë edhe në godina. Situatë e vështire edhe në Nënshkodër, në fshatin Obot, edhe në Dajc situata në përkeqësim”, deklaroi Spahia.
Sipas tij përmbytja është produkt i hapjes së portave te HEC-ve pa paralajmëruar, një akt i KESH për të cilin tha se rrezikoi gjithë qytetarët e Shkodrës.
“Shto këtu edhe izolimin e Shkodrës nga rrëzimi i urës së vjetër të Bunës nga vërshimi i ujit pas hapjes se portave të hidrocentralit dhe dëmtimi i urës aktuale të Bahcallëkut. Është situatë e paprecedent. Qytetarët ishin në rrezik serioz për jetën e tyre”, shtoi Spahia.
