Paralajmërimi i Berishës: Çdo kompani ndërtimi që do marrë pjesë në projektin e Durrësit, do futet në listën e zezë
Në një konferencë për mediat nga selia blu, kreu i Partisë Demokratike, Sali Berisha ka lëshuar një mesazh të fortë dhe me përmbajtje të qartë në drejtim të të gjitha kompanive të ndërtimit që do të bëhen pjesë e projektit për transformimin e Portit të Durrësit në “Durrës Yachts & Marina”.
“Jam këtu për të paralajmëruar se çdo kompani ndërtimi që do marrë pjesë në projektin e Durrësit, do futet në listën e zezë”, tha Berisha, duke kërcënuar edhe me një përgjigje të ashpër nga qytetarët për këtë mega-aferë.
“Dhe i paralajmëroj që të mos shndërrohen në shushunja për të vjedhur një pronë publike të shqiptarëve. Sepse po regjistrohen nënkontraktorë tani. Kjo që po bën Rama dhe Balluku është e pashembullt në histori. Qytetarët shqiptarë nuk mund të qëndrojnë duarkryq përballë këtyre akteve që kalojnë çdo imagjinatë të vjedhjes së pasurive të tyre publike”, shtoi Berisha.
Në vijim, kryedemokrati nënvizoi se do të jetë PD ajo që do u prijë të gjitha nismave, si ligjore dhe nëpërmjet tubimeve për të çuar drejt dështimit projektin në fjalë.
“Të gjitha këto e bëjnë situatën në Shqipëri eksplozive. PD do të përdorë të gjitha format për të kundërshtuar këtë plaçkitje të pronës publike më të çmuar që sot kanë shqiptarët. Porti mijëvjeçar është prona publike më e çmuar se çdo pronë tjetër publike në këtë vend. Ne do t’u primë të gjitha nismave për dështimin e këtij projekti”, nënvizoi ai.
Ish-kryeministri ka denoncuar edhe kryeministrin Rama për mashtrimin me postimin e bërë në Tëitter lidhur me investitorin arab Mohamed Alabbar për projektin “Manhatani i Zagrebit”, i cili është zmbrapsur nga qytetarët dhe krye bashkiaku në kryeqytetin kroat duke çuar në anulimin e tij.
“Përshëndes qytetarët e Zagrebit që hodhën në kosh të plehrave Manhatanin e Eagle Hills, një kompani e cila e lidhur me vëllezërit Kariç, të gjithë të lidhur me Lukashenkon dhe Vuçiçin. Rama paraqiste mbrëmë Eagle Hills si kompania do ndërtojë Manhatanit të Zagrebit, ndërkohë që qytetarët e kishin hedhur në kosh të plehrave. Shikoni ku e çon lakmia për portin e Durrësit, të mashtrojë publikisht qytarët që kësaj kompanie i është besuar ndërtimi i Manhatan në Zagreb. Ajo histori është mbyllur dy vite më parë. Përveç kësaj kryebashkiaku i Zagrebit kishte hapur garë se nuk e kishte të vetën kompaninë. Rama nuk e hap garë se e ka të vetën kompaninë”, shtoi Berisha.
