Avokati Loren Liço i Juri Ymeraj, që është shpallur në kërkim nga SPAK për inceneratorët, ka deklaruar sot para mediave se shoqëria J.P.Y ka kryer aktivitet ligjor me shumë kompani.
Avokati tha se nga inceneratori i Fierit ka përfituar vetëm 7.4 milionë lekë, ku me këto para ka blerë produkt konkret tek një firmë e mirënjohur, e themeluar në vitin 2005, e cila nuk ka asnjë lidhje me Lefter Kokën.
“Kemi ardhur për të marrë informacion për një prej personave në kërkim për inceneratorin e Fierit, Juri Ymeraj“, tha Liço.
Sipas avokatit, ai ka vënë në dijeni gjykatën për udhëtimin e tij jashtë shtetit për disa probleme familjare.
“Pretendohet përpër një skemë të përfshirë me z. Koka, i cili në fakt nuk ka asnjë lidhje. Pretendime për ne nuk qëndrojnë. Kjo gjë mund të vërtetohet thjeshtësisht. Fakti që kanë kërkuar një masë për të, na ka habitur. Ai ka qenë administrator i njërit prej 500 shoqërive, me kontrata dhe transferta parash të rregullta. Punimet që ka bërë ai kanë qenë me vlera të papërfillshme. 7.4 milionë lekë. Kompania e Ymeraj ka pasur aktivitet me shume kompani të tjera, ku kjo është një prej tyre. Me këto para ka blerë produkt konkret tek një firmë e mirënjohur, e themeluar në vitin 2005, e cila nuk ka asnjë lidhje me Lefter Kokën.
S’mund të prezumojmë që meqë kjo kompani ka një kontakt me inceneratorët ka marrëdhënie juridike. Kjo është një kompani e rregullt sipas ligjit, është krijuar rreth 2015. Gjatë largimit është njoftuar organi kompetent për probleme shëndetësore. Më duhet të jem diskret ndaj arsyeve shëndetësore se bëhet fjalë për fëmijët e tij të mitur. Unë sot do marr të dhënat apo provat që janë dorëzuar nga organi i akuzës i ekzistencës apo jo. Megjithëse është dhënë masa në mungesë unë jam i privuar nga familja e tij dhe s’ja kam komunikuar dot“, tha Loren Liço.
