Gjykata e Posaçme e Apelit për Korrupsionin ka pranuar pjesërisht kërkesën e SPAK dhe ka rikthyer dosjen e inceneratorit të Tiranës për shqyrtim të pjesshëm. Seanca e ardhshme është caktuar për 11 mars, ku pritet të ripyeten disa dëshmitarë, përfshirë Sulejman Tola dhe Jetmir Llapaj.
Prokurori i SPAK, Dritan Premçi, kërkoi administrimin e disa provave të reja që nuk ishin marrë në konsideratë gjatë vendimit në shkallën e parë. Ai argumentoi se gjykata duhet të rishikojë provat e mëparshme dhe të marrë në konsideratë rrethanat e reja që kanë dalë pas vendimit të Gjykatës së Lartë Administrative (GJKKO).
“Në momentin kur është marrë vendimi nga GJKKO nuk kanë qenë këto rrethana të reja, që ne i mendojmë të tilla dhe duhet t’i vlerësojë tashmë ky kolegj. Kërkojmë përsëritjen e shqyrtimit gjyqësor për të marrë disa prova sa i përket edhe ankimit që është bërë nga palët. Kjo edhe sa i përket Lefter Kokës, ndaj të cilit është shuar masa e arrestit. Gjykata të vlerësojë provat që janë administruar në shkallë të parë.”-tha prokurori.
Nga ana tjetër, mbrojtja e Lefter Koka e cilësoi kërkesën e SPAK-ut të pabazuar, si në aspektin material, ashtu edhe procedural. Avokati theksoi se Koka është gjykuar dhe shpallur fajtor për çështjen e inceneratorit të Tiranës, dhe dënimi përkon me kohën që ai ka qëndruar në paraburgim. Sipas mbrojtjes, kërkesa për sjelljen e provave të reja nuk ka bazë ligjore dhe duhet rrëzuar.
“Kërkesa e SPAK për risjelljen e shqyrtimit gjyqësor është e pabazuar materialisht dhe proceduralisht. Lefter Koka është dënuar, nuk është shpallur i pafajshëm. Baza ligjore që SPAK kërkon për marrjen e një prove të re nuk është e drejtë për të mbështetur ankimin. Koka është gjykuar dhe hetuar për inceneratorin e Tiranës me masë ‘arrest në burg’, dhe më 16 prill 2025 është deklaruar fajtor që përkon dënimi me kohën kur ai ka qenë në paraburgim dhe gjykata shoi masën e sigurisë ndaj tij sepse përkonte me kohën kur ai ka qëndruar në paraburgim. Kërkojmë rrëzimin e kërkesës së prokurorit.”
Seanca vazhdon me shqyrtimin e mëtejshëm të provave dhe ankimeve të palëve.
