Kryetari i Partisë Demokratike, Sali Berisha deklaroi këtë të Enjte në emision televiziv se qeveria e tij kishte një qasje të ndryshme nga sot, ndaj atyre që konsiderohen “oligarkë”.
Berisha tha se nuk u ka bërë kurrë favore biznesmenëve të mëdhenj. Ai solli edhe dy shembuj.
Më tej, kreu i PD-së u shpreh se qeveria Rama ka një qasje tjetër me “oligarkët”.
Në emisionin “Të Paeskopozuarit”, Berisha u pyet pse s’përmend me emra oligarkë.
“Përmend me emra”, u përgjigj Berisha. Më tej vijoi: “Kur i përmend? Kur shof se cënohet në mënyrë flagrante interesi publik. Përmend me emra. Në vlerësimin tim për të gjithë këtë klientelë dhe oligarki ka një person përgjegjës dhe ky është Edi Rama”.
Për 10 vitet fundit?
“S’kishte më përpara”, u përgjigj Berisha.
“Po të doni, i marrim me radhë më të pasurit e këtij vendi. Nëse sot Samir Mane është një ndër më të pasurit’ në mënyrë absolute s’ka përfituar dhe s’ka kërkuar një favor nga Berisha përveç një. Po ndërtonte njer magazina të mëdha dhe ishin disa familje që kishin ndërtuar dhe kërkoi ti zgjidhte vet të gjitha përveç legalizimeve. Asnjë të vetëm. Ka investuar te TEG-u, unë Berisha kam marrë pjesë në inaugurim dhe asgjë tjetër, asgjë prej gjëje. QTU e ka ndërtuar pasi erdhëm ne në pushtet dhe e inauguroi pasi erdhëm ne. Mund të ketë kërkuar ndonjë gjë tjetër që ndoshta dhe i takonte, por s’i është dhënë. Atëherë pse do ta quaj unë oligark unë atë, se me sektor privat ai kishte lidhje me Karfur, me kompani të tjera të mëdha, jo me qeverinë. Kur unë kam qenë në qeveri akset e mëdha janë ndërtuar nga kompani ndërkombëtare, aksi Lushnje-Fier, Shkodër-Hahn i Hotit, Levan-Tepelenë, Tepelenë-Gjirokastër. Gjatë qeverisjes sonë s’është firmosur asnjë kullë”, tha Berisha.
Më tej, solli një tjetër shembull.
“Kalojmë te Kastrati. Ai ishte më i madhi në naftë? Ishte. 32 licenca ka lëshuar qeveria shqiptare. Dhe sa për dijeni kur kërkoi që ti hiqej TVSH-ja e naftës që ja shiste Bankers-it për injektim, s’ju hoq. Kishte dy rryma, por s’ju hoq. Sot është kontrabanda e naftës minimumi 250 mijë ton në vit. E vetmja që s’bëhet dot pa qeveri. Po nafta dihet si vjen. Me peshkarexhë sjell naftën nga Libia dhe e shkarkon qeveria”, tha Berisha.
“Marrim çdo rast tjetër. Unë jam përpjekur që biznesi shqiptar të zhvillohet po s’kam firmosur asnjë kullë. Një që ishte parashikuar te fundi i bulevardit të ri nga një arab doli Rama dhe i kërkoi në telefon 20 përqind, do të thoshte 100 milion”, shtoi.
Zoti Ndroqi ishte ndërmjetësi?
“Po e dike dhe ti”, u përgjigj Berisha.
Berisha premtoi se çdo projekt që prek interesin publik dhe është bërë në kundërshtim me procedurat do të zhbëhet me ardhjen e PD-së në qeverisje.
“Për çdo aferë Kryeministri është përgjegjës. Nëse Enti të thotë që kjo procedurë s’mund të përdoret se është antiligjore dhe kryeministri firmos, atëherë ai e bën kur ndërmarrja është e tij, se se bën dot ai as për vëllain e tij”, u shpreh Berisha.
Më tej gjatë bisedës në studio, Berisha tha se ka denoncuar me emra sa herë ka informacione se cënohet interesi publik dhe shtoi se do vijojë ta bëjë. “Por për mua, kreu i Meduzës është Edi Rama”, u shpreh.
