Ndryshimet e vitit 2021 në ligjin për statusin e gjyqtarëve e prokurorëve kanë përfunduar në Gjykatën Kushtetuese.
Unioni i Gjyqtarëve të Shqiptarëve ka depozituar padi në Kushtetuese kundër nismës së mazhorancës.
Referuar padisë, unioni kërkon shfuqizimin si të papajtueshëm me Kushtetutën e Republikës së Shqipërisë të nenit 2 pika 1 të ligjit nr. 50/2021 “Për disa shtesa dhe ndryshime në ligjin nr. 96/2016 “Për statusin e gjyqtarëve dhe prokurorëve në republikën e shqipërisë”, të ndryshuar”, i cili ka ndryshuar nenin 12, pika 5, shkronja “a” të ligjit për “statusin e gjyqtarëve dhe prokurorëve në republikën e shqipërisë”, të ndryshuar.
Po ashtu, unioni kërkon shfuqizimin si të papajtueshëm me Kushtetutën e Republikës së Shqipërisë të nenit 1, pika 7, paragrafi i dytë germa “b” dhe “c” të ligjit nr.8097, datë 21.3.1996 “Për pensionet shtetërore suplementare të personave që kryejnë funksione kushtetuese dhe të punonjësve të shtetit”, konkretisht: “…b) për personat, të cilët kanë vite shërbimi pas datës 1.1.2019, paga e muajit të fundit që zbatohet për atë funksion, sipas legjislacionit në fuqi, në momentin e lindjes të së drejtës për përfitim, por në asnjë rast kjo pagë referuese nuk e tejkalon pagën e Presidentit të Republikës; c) për personat, të cilët kanë vite shërbimi para dhe pas datës 31.12.2018, paga referuese për periudhën e shërbimit është paga mesatare mujore referuese që llogaritet si raport i shumës së pagave referuese të të gjitha funksioneve e detyrave që kanë gëzuar personat, respektivisht sipas përcaktimeve të shkronjave “a” dhe “b”, me shumën e muajve që njihet si periudhë shërbimi për të gjitha funksionet e detyrat, por në asnjë rast kjo pagë referuese nuk e tejkalon pagën e Presidentit të Republikës.”
