Policia ka arrestuar këtë të Hënë dy shtetas të cilët tentuan të ndihmojnë disa emigrantë të kalojnë në mënyrë të paligjshme drejt vendeve të BE-së.
Uniformat blu bëjnë me dije se në pranga ka rënë shtetasi R. D., 60 vjeç, banues në Tekirdag, Turqi dhe R. M., 51 vjeç, banues në Yzberisht, Tiranë.
“Specialistët e Seksionit për Hetimin e Trafiqeve të Paligjshme dhe Narkotikëve të DVP Korçë referuan materialet në Prokurori dhe filloi procedimi penal në gjendje të lirë, për veprën penale “Ndihma për kalim të paligjshëm të kufijve”, për shtetasit: R. D., 60 vjeç, banues në Tekirdag, Turqi dhe R. M., 51 vjeç, banues në Yzberisht, Tiranë. Në Pikën e Kalimit Kufitar Kapshticë, në hyrje të Republikës së Shqipërisë, gjatë kontrollit të ushtruar nga shërbimet e Policisë Kufitare, në mjetet kamion tip “Daf” dhe “Benz”, që secili nga këta shtetas drejtonte, u gjetën të fshehur 9 emigrantë, të cilët kishin synim kalimin drejt vendeve të BE-së”, njofton policia.
Materialet i kaluan Prokurorive të Rretheve Gjyqësore Pogradec dhe Korçë, për veprime të mëtejshme.
