Në takimin midis qeverisë së Shqipërisë dhe asaj të Maqedonisë së Veriut që zhvillohet në Shkup, zv/kryeministri i RMV Artan Grubi ka prezantuar tre projekte që mund të vijnë në jetë nga bashkëpunimi midis dy vendeve.
Grubi kërkon që midis dy vendeve të arrihet dakordësia për çeljen e një pike të re kufitare dhe me rëndësi të madhe është ndërtimi i hekurudhës së shumëpërfolur Shkup-Durrës.
Pritet që pika e re kufitare të jetë diku pranë Qafë Thanës me qëllim uljen e kostove të ndërtimit të autostradës që do të lidhë dy vendet. Grubi shpjegoi se për caktimin e vendkalimit të ri do të ngrihet një Komision i përbashkët ekspertësh që do të përcaktojë vendndodhjen dhe çdo aspekt tjetër deri te çështjet ligjore.
“Propozoj disa pika shtesë për hapjen e një vendkalimi të ri kufitar, formimin e komisionit të përbashkët të ekspertëve që do të përcaktojë vendndodhjen e rrugëve, çështjet ligjore dhe ato me interes të përbashkët. Kjo ka të bëjë me lidhjen e autostradave tona me korridorin tetë. Kemi miratuar ligjin në kuvend dhe jemi në pritje të firmosjes së kontratës në mes të dhjetorit me shpresë se do të bëhet një vendkalim tjetër që do të ulë koston me dhjetëra miliona euro të ndërtimit të autostradës”, tha Grubi.
Zv/kryeministri gjithashtu për të parën herë zbuloi idenë e tij, e mbështetur fort nga Rama për krijimin e një “Porti të Thatë” në Strugë që “do të nxjerrë në det” Maqedoninë e Veriut përmes Shqipërisë.
E dyta ka të bëjë me lidhjen hekurudhore Shkup Durrës që dy qeveritë tona të angazhohen për përfundimin e saj. E treta që është një ide e kryeministrit Rama.
“Bëhet fjalë për Portin e thatë në Strugë, qeveritë e dy vendeve të kryejnë studimin për ndërtimin e një zone në formën e një porti të Thatë për ngarkesat që vijnë nga Porti i Durrësit. Dua të falenderoj kryeministrin Rama që na mundësoi qasjen e një vendi pa det në Portin e Durrësit. Vetëm në këtë mënyrë zhvillohen marrëdhëniet vëllazërore”, deklaroi Grubi.
Grubi gjithashtu nënvizoi se nuk do të jetë tabu që në krye të RMV të vendoset një shqiptar.
“Në aspektin e të drejtave kombëtare gjuha shqipe është zyrtare. Flamuri shqiptar është zyrtar. Kemi tre universitete në gjuhën shqipe. Në të gjithë nivelet flitet shqip. Nuk është më tabu që kryetari i kuvendit, i gjykatës apo i federatës të jetë shqiptar. Por nuk është tabu as sot dhe as nesër që kryeministri të jetë shqiptar”, shtoi ai.
