Presidenti i Serbisë, Aleksandar Vuçiç, ka zhvilluar një bisedë telefonike me homologun ukrainas, Volodymyr Zelensky, për marrëdhëniet mes dy vendeve, proceset e integrimit evropian dhe agjendën ndërkombëtare për periudhën e ardhshme.
“U pajtuam që ekziston hapësirë për mbështetje reciproke, mbi të cilën do të vazhdojmë të punojmë së bashku,” shkroi Vuçiç në Instagram, pa dhënë detaje të tjera. Ai shtoi se me Zelenskyn ranë dakord të mbajnë kanale komunikimi të hapura edhe në të ardhmen.
Ndërkaq, presidenti ukrainas tha se gjatë bisedës diskutuan edhe mundësitë e bashkëpunimit në fushën e sigurisë rajonale. “Vendet tona e ndajnë këtë interes dhe do të punojmë mbi të. Rishikuam agjendën ndërkombëtare dhe u pajtuam të qëndrojmë në kontakt dhe të vazhdojmë koordinimin,” shkroi Zelensky.
Serbia mbetet një nga vendet evropiane që nuk është bashkuar sanksioneve perëndimore ndaj Rusisë pas pushtimit të Ukrainës, megjithatë ka mbështetur integritetin territorial të Ukrainës dhe ka dërguar ndihma humanitare. Beogradi ka mohuar çdo eksport të drejtpërdrejtë të armëve drejt Ukrainës, duke theksuar se nuk mund të ndikojë nëse armët serbe përfundojnë në front nga vende të tjera.
