Grupi “Homeland Justice”, që ka marrë përsipër autorësinë e dy sulmeve kibernetike ndaj faqeve online të institucioneve, ka publikuar këtë të Mërkurë të dhëna të tjera.
Në skedën e shpërndarë në aplikacionin e komunikimit “Telegram”, janë të dhënat personale të kreut të SHISH Helidon Bendo, informacion mbi përbërjen familjare, të dhënat e letërnjoftimeve të tij dhe pasaportave. Numrat e celularit, vendbanimi dhe të informacione për dy automjete janë po ashtu të pasqyruara.
Gjithashtu, hakerat kanë publikuar edhe një listë me hyrje-daljet nga territori i vendit, pikat e kalimit, datat kur është kaluar kufiri dhe dokumentet që ka paraqitur te autoritetet doganore.
Kjo është e disata herë që grupi “Homeland Justice” publikon të dhëna që besohet se janë marrë nga sulmet kibernetike, për të cilat qeveria fajëson Tehranin zyrtar.
Më të bujshme ishin disa dokumenta të klasifikuara sekret që besohet se janë marrë nga hakërrimi i postës elektronike të ish-kreut të Policisë së Shtetit, Gledis Nano.
