Nëse themi Genc Tomori kemi përmen dur edhe një pjesë të mirë të historisë së Partizanit. Tani në pozicionin e drejtorit të akademisë së klubit të kuq, ish-mesfushori i “demave” në vitet ’80 ka folur për “Panorama Sport”.
Tomori tregon rëndësinë e madhe të stadiumit, që po finalizohet ditët e fundit dhe frytet që ai do t’i japë akademisë dhe klubit. 62-vjeçari flet edhe për skuadrën e drejtuar nga Kolela, nga cila pret më shumë agresivitet.
Si po shkojnë punimet në stadiumin e ri?
Një stadium që të bëhet në ato përmasa, sipas rregullave të FIFA-s dhe UEFA-s, duhet një punë e madhe, por them se për ndeshjen e së hënës janë plotësuar 90% e kushteve që kërkon organizimi i një ndeshjeje të Kategorisë Superiore. Më vonë do të punohet për të luajtur edhe ndeshjet e Kupave të Europës.
Një jetë me Partizanin dhe më në fund keni shansin ta shihni ekipin të luajë në shtëpinë e vet. Sa do ta ndihmojë kompleksi Partizanin?
Unë jam pjesë e Partizanit prej moshës 10 vjeç. Jam nga të paktët që Partizani merrte atëherë nga moshat. Një jetë me Partizanin… Të gjithë ekipet që janë në ligën profesioniste po stërviten normalisht në stadium, por për të bërë një akademi akoma më cilësore presim edhe investimin e dy fushave të tjera. Kjo është edhe një thirrje që ia bëj atyre që e kanë në dorë, për të zbatuar një projekt që i përshtatet standardeve të një klubi me histori. Partizani nuk ka qenë vetëm i Tiranës, por i gjithë Shqipërisë, ashtu siç është edhe tani. Ka pasur shumë lojtarë të rretheve, që kanë luajtur te Partizani dhe janë formuar këtu e kanë lënë gjurmë. Kështu që ndërtimi i stadiumit për mua është më i rëndësishëm se marrja e një kampionati, sepse çdo gjë shkon në vendin ku i takon. Unë dhe të gjithë lojtarët dhe trajnerët e kemi ëndërruar këtë dhe më në fund Partizani ka shtëpinë e vet. Kjo është meritë e presidentit pa dyshim, sepse pa një president të fuqishëm, nuk bëhet.
Ku gaboi Partizani ndaj Egnatias dhe ndaj Laçit?
Gabime do të ketë, por mendoj se ekipi duhet të krijojë më shumë agresivitet, jo vetëm në sulm, por i gjithë ekipi të jenë në sinkron, që nga portieri. Partizani duhet ta udhëheqë kampionatin, të gjithë duhet të kenë bindjen për të fituar çdo ndeshje, në mënyrë që të qartësohet edhe ideja se Partizani është për titull.
/Panoramasport
